قذافی سٹیڈیم کی تکمیل پر 1500 ورکرز کے اعزاز میں ظہرانہ
لاہور (سپورٹس ڈیسک ) چیئرمین پاکستان کرکٹ بورڈ (پی سی بی )محسن نقوی کی جانب سے قذافی سٹیڈیم کی ریکارڈ مدت میں تکمیل پر 1500 سے زائد ورکرز کے اعزاز میں خصوصی ظہرانہ دیا گیا۔۔۔
مزدوروں نے مٹن قورمہ ، چکن روسٹ، بیف پلاؤ اور گرما گرم نان پر مشتمل لنچ کیا۔زردہ،رائتہ، فریش سلاد،منرل واٹر ، کولڈ ڈرنکس اور کشمیری چائے سے مزدوروں کی تواضع کی گئی۔ چیئرمین پی سی بی محسن نقوی نے مزدوروں کے ساتھ ان کی نشستوں پر جا کر ملاقات کی اور لنچ کیا ۔مزدوروں نے چیئرمین پی سی بی محسن نقوی کے ساتھ سلفیاں اور تصویریں بنوائیں۔ محسن نقوی نے دن رات محنت کر کے سٹیڈیم مکمل کرنے پر ورکرز کا شکریہ ادا کیا اور شاباش دیتے ہوئے شاندار الفاظ میں خراج تحسین پیش کیا،انہوں نے مزدوروں کو آج پاک نیوزی لینڈ میچ دیکھنے کی دعوت بھی دی اورکہاکہ آپ قوم کے ہیرو ہیں ، سب مبارکباد کے مستحق ہیں۔ قذافی سٹیڈیم آپ کا سٹیڈیم ہے ، قذافی سٹیڈیم کو ریکارڈ مدت میں مکمل کرنے میں آپ کی دن رات کی محنت شامل ہے ،مزدوروں نے چیئرمین پی سی بی کو مخاطب کرتے ہوئے کہا کہ آپ نے کمال کر دیا، ہم خود آپ کو سٹیڈیم میں صبح شام دیکھتے ہیں۔لنچ بھی ہم اپنے '' ہتھیاروں'' کے ساتھ کر رہے ہیں۔ بعض مزدور بیلچہ ساتھ اٹھائے لنچ کرتے رہے ۔
