چیمپئنز ٹرافی، پی سی بی کو 869 کروڑ کا نقصان ، بھارتی میڈیا کا دعویٰ
لاہور(سپورٹس ڈیسک)بھارتی ذرائع ابلاغ نے پاکستان کی میزبانی میں کھیلے گئے چیمپئنز ٹرافی 2025۔۔ کے اخراجات کی رپورٹ شائع کرتے ہوئے
پاکستان کرکٹ بورڈ کو کروڑوں روپے نقصان پہنچنے کا دعویٰ کیا ہے ۔بھارتی میڈیا کی رپورٹ کے مطابق پاکستان کرکٹ بورڈ کو چیمپئنز ٹرافی 2025 کی میزبانی کے دوران 869 کروڑ روپے کا نقصان ہوا، جس کے بعد بورڈ نے کھلاڑیوں کی میچ فیس میں کٹوتی اور 5 سٹار ہوٹلوں کی سہولت ختم کرنے جیسے سخت اقدامات اٹھائے ہیں۔این ڈی ٹی وی کے مطابق، پی سی بی نے چیمپئنز ٹرافی کی میزبانی کے دوران اپنی سرمایہ کاری پر 85 فیصد کا نقصان برداشت کیا ہے ۔رپورٹس کے مطابق، پی سی بی کو اس ٹورنامنٹ کی میزبانی کے دوران 85 ملین ڈالر (869 کروڑ روپے ) کا خسارہ ہوا، جس کی وجہ سے بورڈ کے مالی حالات مزید خراب ہوگئے ہیں۔ پی سی بی نے چیمپئنز ٹرافی کے تین میزبان شہروں راولپنڈی، لاہور اور کراچی میں سٹیڈیمز کو اپ گریڈ کرنے کے لیے 18 ارب پاکستانی روپے خرچ کیے ۔ یہ لاگت ابتدائی بجٹ سے 50 فیصد زیادہ تھی۔اس کے علاوہ، بورڈ نے ایونٹ کی تیاریوں پر 40 ملین ڈالر کی اضافی رقم خرچ کی۔ تاہم، میزبانی فیس کے طور پر پی سی بی کو صرف 6 ملین ڈالر واپس ملے ، جبکہ ٹکٹ فروخت اور سپانسرشپ سے حاصل ہونے والی آمدنی نہ ہونے کے برابر تھی۔ بھارتی میڈیا کے مطابق، پی سی بی کے مالی نقصانات کے اثرات کھلاڑیوں اور بورڈ کے مستقبل کے منصوبوں پر بھی پڑ سکتے ہیں۔ تاہم پی سی بی چیئرمین محسن نقوی نے اس صورتحال کو بہتر بنانے کے لیے فوری اقدامات کا وعدہ کیا ہے ۔
