ویمنز ورلڈ کپ کوالیفائر کیلئے 15 رکنی قومی سکواڈ کا اعلان
لاہور(سپورٹس ڈیسک )خواتین کی قومی سلیکشن کمیٹی نے آئی سی سی ویمنز ورلڈ کپ کوالیفائر کیلئے 15 رکنی سکواڈ کا اعلان کر دیا۔۔
سکواڈ کا انتخاب کھلاڑیوں کی فٹنس اور فارم کا جائزہ لینے کے بعد کیا گیا ہے جہاں کھلاڑیوں نے وارم اپ میچز اور پریکٹس سیشنز میں حصہ لیا۔فاطمہ ثنا آئی سی سی ویمنز کرکٹ ورلڈ کپ کوالیفائر میں پاکستان کی قیادت کریں گی جبکہ اوپنر شوال ذوالفقار کی 16 ماہ بعد انٹرنیشنل کرکٹ میں واپسی ہوگی۔دیگرکھلاڑیوں میں نائب کپتان منیبہ علی، عالیہ ریاض، ڈیانا بیگ، گل فیروزہ، وکٹ کیپر نجیہہ علوی، نشرح سندھو، نتالیہ پرویز، عمیمہ سہیل، رامین شمیم، سعدیہ اقبال ، سدرہ امین، سدرہ نواز اور سیدہ عروب شاہ شامل ہیں۔غلام فاطمہ، وحیدہ اختر اور ام ہانی کو ریزرو کھلاڑی کے طور پر شامل کیا گیا ہے ۔6 ٹیموں پر مشتمل آئی سی سی ایونٹ میں میزبان پاکستان کے ساتھ بنگلہ دیش، آئر لینڈ، اسکاٹ لینڈ، تھائی لینڈ اور ویسٹ انڈیز شامل ہیں۔لاہور کے قذافی سٹیڈیم اور ایل سی سی اے گراؤنڈ اس ایونٹ کے 15 میچوں کی میزبانی کرینگے ،قذافی سٹیڈیم میں ہونے والے افتتاحی میچ میں پاکستان کا مقابلہ آئر لینڈ سے ہو گا۔دریں اثنا آئی سی سی نے ویمنز ورلڈ کپ کوالیفائر کے وارم اپ میچز کا شیڈول جاری کر دیا، میچز 5 اپریل اور 7 اپریل کو کھیلے جائیں گے ۔پاکستان ٹیم 5 اپریل کو تھائی لینڈ، 7 اپریل کو ویسٹ انڈیز کے خلاف وارم اپ میچ کھیلے گی۔
