بخشی خانوں ،لاک اپ کی ری ویمپنگ منصوبے کی منظوری:مریم نواز کی ہولی فیملی ہسپتال آمد ،مریضوں سے گفتگو
لاہور(سیاسی رپورٹرسے )وزیر اعلیٰ پنجاب مریم نوازشریف نے جیل ریفارمز کا جامع پلان طلب کر لیا۔ فیصل آباد اور راولپنڈی میں ویمن جیلوں کے قیام کی اصولی منظوری دی گئی۔ انہوں نے نئی جیلوں کو شہر سے باہر قائم کرنے کی ہدایت کی ۔
مریم نواز نے خصوصی اجلاس کی صدارت کرتے ہوئے بخشی خانوں اور لاک اپ کی ری ویمپنگ کا حکم دیا ہے ،پنجاب بھر کے بخشی خانے اور لاک اپ کی ری ویمپنگ پراجیکٹ کی منظوری دے دی گئی -اجلاس میں جیلوں سے جرائم پیشہ افراد کے ممکنہ بیرونی رابطوں پر تشویش کااظہار کیا گیا اور سائبر سکیورٹی کے انتظامات کو فول پروف بنانے کی ہدایت کی گئی ۔ سینئروزیر مریم اورنگزیب،وزیر اطلاعات عظمیٰ زاہد بخاری، ایم پی اے ثانیہ عاشق، چیف سیکرٹری زاہد اختر زمان، ہوم سیکرٹری نورالامین مینگل، آئی جی جیل خانہ جات فاروق نذیر اور دیگر نے شرکت کی۔دریں اثنا وزیر اعلیٰ مریم نواز نے اچانک ہولی فیملی ہسپتال راولپنڈی کادورہ کیا اور مختلف وارڈز کا معائنہ کیا۔ وزیر اعلیٰ نے ہولی فیملی ہسپتال نیو بلاک کے دورے پر مزدوروں کی کم اجرت کا نوٹس لیتے ہوئے مزدوروں کو قانون کے مطابق اجرت کی پوری ادائیگی کی ہدایت کی۔ وزیر اعلیٰ نے پیڈز ایمرجنسی،مدر اینڈ چائلڈ بلاک اور دیگر وارڈ ز میں مریضوں سے گفتگو اوران کی تیمارداری کی۔
بعض مریضوں نے ہسپتال میں درپیش مسائل سے آگاہ کیا۔ ۔ انہوں نے مریضوں سے ادویات کی فراہمی اور دستیاب سہولتوں کے بارے میں دریافت کیا۔ وزیر اعلیٰ زیر علاج مریضوں کے اہل خانہ کے پاس رک گئیں جو درخت کے نیچے بیٹھے شدید گرمی کی وجہ سے دستی پنکھوں سے ہوا لینے پر مجبور تھے ۔ وزیر اعلیٰ نے بزرگ شہری اور اہل خانہ سے بات چیت کی اور مریض کے بارے میں دریافت کیا۔ وزیر اعلیٰ نے مریضوں کے لواحقین کے لئے شیڈ اور پنکھوں کا انتظام کرنے کی ہدایت بھی کی۔ مریم نواز نے ایمرجنسی میں زیر علاج مریض بچوں کی عیادت کی اور ایک بچی سے خوشگوار موڈ میں باتیں کیں۔ ننھی بچی نے وزیر اعلیٰ کے ساتھ ہائی فائی کیا۔ وزیر اعلیٰ نے تین سالہ حسنین کے دل میں پیدائشی سوراخ کے علاج کیلئے فوری اقدامات کی ہدایت کی۔ وزیر اعلیٰ کی ہدایت پر آر آئی سی سے ڈاکٹروں کی ٹیم فوری طور پر ہولی فیملی ہسپتال پہنچ گئی۔ وزیر اعلیٰ مریم نوازشریف نے ہسپتال کے زیر تعمیر نیوبلاک کا بھی جائزہ لیا اور سی اینڈ ڈبلیو کو 30جون تک تعمیر مکمل کرنے کی ہدایت کی۔
