پی ٹی آئی، حکومت کے مذاکرات نہیں دیکھ رہا:شیخ رشید
اسلام آباد(مانیٹرنگ ڈیسک)سربراہ عوامی مسلم لیگ شیخ رشید احمد نے کہا دکھ ہے بانی پی ٹی آئی نے مجھ سے تعلق نہیں نبھایا،شہباز شریف سے نواز شریف کم کرپٹ ہے ،نواز شریف کے خلاف 2014ء میں لندن پلان بنا تھا۔
ٹی وی کو انٹرویو میں شیخ رشید نے کہا میرے خلاف جتنی بھی شہادتیں ہیں وہ پی ٹی آئی کی ہیں ، بانی پی ٹی آئی کی حد تک میرا سافٹ کارنر تھا، ہے اور رہے گا لیکن میرے ساتھ ٹھیک نہیں ہوا،پی ٹی آئی اورحکومت کے مذاکرات کامیاب ہوتے نہیں دیکھ رہا، پہلے تو یہ مذاکرات کر نہیں رہے تھے اب جو شرائط ہیں وہ نہیں مانیں گے ، عید کے بعد 2 مہینے بہت حساس ہیں، اگست تک آرپار ہوتا دیکھ رہاہوں، کچھ نیا بھی ہو سکتا ہے ، نواز شریف گڈبک میں نہیں، نوازشریف پھر بھی شہباز سے بہتر ہے جو کم کرپٹ ہے ، شہباز تو صرف دستخط کیلئے ہے ، جس کی کوئی عزت نہیں، مستقبل سے متعلق بانی پی ٹی آئی سے بات کروں گا تو پھر بتا سکتا ہوں، ابھی میں اڈیالہ نہیں گیا کیونکہ پی ٹی آئی کی نئی ٹیم سے کوئی تعلق ہی نہیں، میں اڈیالہ جاکرنئی مصیبت کو جنم نہیں دینا چاہتا، میں کھڑا رہا اور 40 دن کیا اگر 40 سال بھی کھڑارہنا پڑتا تو رہ جاتا، آپ حیران ہوں گے میرے خلاف جتنی بھی شہادتیں ہیں وہ پی ٹی آئی کی ہیں لیکن میرا ضمیر مطمئن اور دل کو سکون ہے ، دکھ ہے بانی پی ٹی آئی کو مجھ سے تعلق نبھانا چا ہئے تھا لیکن ایسا نہیں ہوا، میری صحت خراب ہوگئی تھی ورنہ چلہ لمبا ہوجاتا ، چاہتا تو اسی گاڑی میں واپس آجاتا جس میں گیا تھا لیکن میں نے کوئی تحریردی نہ ویڈیوبنوائی۔ 9 مئی میں کوئی قلفی والا اور ریڑھی والا پکڑکر پولیس نے گنتی پوری کی اصل لوگ تو باہر ہیں ۔کچھ شک نہیں پی ٹی آئی حکومت گرانے میں قمر باجوہ ملوث تھے ۔ میں ایک گھر میں جا رہا تھا تو وہاں سے چودھری سالک اور محسن نقوی کونکلتے دیکھاتوسمجھ گیا، مجھ سمیت پاکستان میں کوئی شخص گیٹ نمبر4 کے بغیر سیاست میں نہیں آیا ۔ میرے چلے کے بعد لوگوں نے فون کرنا بھی چھوڑدیاتھا، جس لال حویلی میں روزانہ 2 چار سو بندہ آتا تھا وہاں اب 20 لوگ آتے ہیں۔
