ٹرمپ کو مبار کباد،نئی امریکی انتظامیہ کیساتھ ملکر کام کرنے کا م کرنے کے منتظرہیں:شہباز شریف
اسلام آباد(دنیا نیوز،نامہ نگار)وزیراعظم شہباز شریف نے ڈونلڈ ٹرمپ کو امریکی صدارتی انتخابات میں دوسری بار تاریخی کامیابی پر مبارکباد دی ہے ۔سوشل میڈیا پلیٹ فارم ایکس پر انہوں نے کہا پاکستان اور امریکا تعلقات کو مزید مضبوط اور وسیع کریں گے ، ٹرمپ انتظامیہ کے ساتھ ملکر کام کرنے کے منتظر ہیں ۔
چیئرمین پیپلز پارٹی بلاول بھٹو نے ایکس پر اپنے پیغام میں ڈونلڈٹرمپ کوصدارتی انتخاب میں تاریخی کامیابی پر مبارکباد دیتے کہا امید ہے امریکا کی نئی انتظامیہ امن کو ترجیح دے گی اور ٹرمپ انتظامیہ عالمی تنازعات ختم کرنے میں کردار ادا کرے گی۔وزیر اعلیٰ پنجاب مریم نوازنے بھی ڈونلڈ ٹرمپ کو صدر منتخب ہونے پر مبارکباد دی اور امریکی عوام کیلئے نیک تمناؤں کا اظہار کیا ۔ تحریک انصاف کے رہنما زلفی بخاری نے بانی پی ٹی آئی کی جانب سے ٹرمپ کو مبارکباد دے دی،ایکس پر اپنے بیان میں زلفی بخاری نے کہا عمران خان اور پی ٹی آئی کی جانب سے ڈونلڈ ٹرمپ اور جے ڈی وانس کو جیت مبارک ہو،یہ عظیم فتح بڑی مشکلات اور رکاوٹوں کا سامنا کرکے حاصل کی گئی، یہ کامیابی حقیقی تبدیلی اور معاشی استحکام کیلئے واضح آواز ہے ، امید ہے یہ نیا باب عالمی مسائل کے حل کی سمت میں فیصلہ کن اقدامات کا مشاہدہ کرے گا۔
