مریم نواز کا کاروباری افراد کو ضرورت کے مطابق قرض دینے کا حکم
لاہور(اپنے نامہ نگار سے )وزیراعلیٰ مریم نواز شریف نے آسان کاروبار فنانس اورآسان کاروبار کارڈسکیم کو آسان تر بنانے کی ہدایت کی اور حکم دیا ہے کہ کاروباری حضرات کو ضرورت کے مطابق قرض دئیے جائیں۔
وزیراعلیٰ کی زیر صدارت گزشتہ روز خصوصی اجلاس ہوا جس میں آسان کاروبارفنانس اورآسان کاروبار کارڈ پراجیکٹس پر پیش رفت کا جائزہ لیا گیا،مریم نواز نے کاروبار فنانس کیلئے نئے یونٹ قائم کرنے والے کاروباری افراد کی حوصلہ افزائی کی ہدایت کی۔ بریفنگ میں بتایا گیا کہ قرض حاصل کرنیوالو ں میں ٹرانسپورٹ،فارما سیوٹیکل،چھوٹے کاروبارکرنیوالے افراد شامل ہیں،80ہزارافرادکی قرض کی درخواستیں منظور ہوئی ہیں جبکہ کاروبار فنانس اورکاروبار کارڈ کے ذریعے 34ہزار کاروباری افرا د کیلئے قرض کا اجراء کیا گیا ۔ وزیراعلیٰ نے قرض حاصل کرنے والے تمام افراد سے فیڈ بیک لینے کا حکم دیا،انہوں نے اجلاس کے دوران ہی قرض حاصل کرنے والے افراد سے اچانک کال کرکے خودفون پر با ت چیت کی اور قرض حاصل کرنے کے مراحل کے بارے میں دریافت کیا،انہوں نے کاروبار فنانس سکیم میں شامل افراد کی کامیابی کی دعا کی۔
