پاکستان اور آذربائیجان کا سٹریٹجک شراکت داری بڑھانے پر اتفاق
لاچین ،اسلام آباد(نامہ نگار،مانیٹرنگ ڈیسک، دنیا نیوز،اے پی پی)وزیراعظم شہباز شریف اور جمہوریہ آذربائیجان کے صدر الہام علییوف نے دونوں ممالک میں سیاسی، اقتصادی، دفاعی اور ثقافتی تعاون پر اطمینان کا اظہار کرتے ہوئے باہمی طور پر فائدہ مند شعبوں میں سرمایہ کاری کے ذریعے سٹریٹجک شراکت داری بڑھانے پر اتفاق کیاہے ۔
دونوں رہنمائوں نے علاقائی استحکام، باہمی خوشحالی اور کلیدی بین الاقوامی امور پر اصولی موقف کو فروغ دینے کے لئے مربوط کوششوں کی اہمیت پر زور دیا۔منگل کو وزیراعظم شہباز شریف کی آذربائیجان کے صدر الہام علییوف سے لاچین شہر میں ملاقات ہوئی۔ نائب وزیراعظم اور وزیر خارجہ سینیٹر اسحاق ڈار ، فیلڈ مارشل سید عاصم منیر، وفاقی وزیر اطلاعات و نشریات عطا اﷲ تارڑ اور وزیر اعظم کے معاون خصوصی طارق فاطمی بھی ملاقات میں موجود تھے ۔وزیر اعظم نے آذربائیجان کے یوم آزادی پر صدر اور آذربائیجان کے عوام کو پرتپاک مبارکباد پیش کی اورکہا آذربائیجان کے عوام کا پاکستانی عوام کے ساتھ لازوال رشتہ ہے ۔ وزیراعظم نے بھارت سے جنگ کے دوران پاکستان کی غیر متزلزل حمایت پر آذربائیجان کے صدر کا شکریہ ادا کیا اور برادر ملک کی قیادت اور عوام کی جانب سے اظہار یکجہتی کو سراہا، بھارت کیخلاف معرکہ حق میں پاکستان کی کامیابیوں پر آذر بائیجان میں جشن منایا گیا تھا۔ملاقات کے دوران دونوں رہنمائوں نے دوطرفہ تعلقات کے مکمل دائرہ کار کا جائزہ لیا اور باہمی سیاسی، اقتصادی، دفاعی اور ثقافتی تعاون پر اطمینان کا اظہار کیا۔
انہوں نے باہمی طور پر فائدہ مند شعبوں میں سرمایہ کاری کے ذریعے سٹریٹجک شراکت داری کو متنوع بنانے کے لئے اپنے مشترکہ عزم کا اعادہ کیا۔ وزیراعظم نے کہا دونوں ممالک نے ہمیشہ ایک دوسرے کا ساتھ دیا ہے ۔ آذربائیجان کی جانب سے پاکستان میں سرمایہ کاری کی پیشرفت کے حوالے سے وفود کے تبادلے پر اتفاق کیا گیا۔ یہ بھی طے پایا کہ دونوں ممالک میں وفود کی سطح پر ملاقات بہت جلد کی جائے گی۔ملاقات کے اختتام پر دونوں رہنمائوں نے پاکستان،آذربائیجان شراکت داری کو مزید گہرا کرنے اور دوطرفہ اور علاقائی سطح پر مشترکہ مقاصد کو آگے بڑھانے کے لئے مل کر کام کرنے کے عزم کا اعادہ کیا۔قبل ازیں وزیراعظم شہباز شریف دورہ ایران مکمل کرکے پاکستان،ترکیہ، آذربائیجان سہ فریقی اجلاس میں شرکت کے لئے آذربائیجان کے شہر لاچین پہنچے تو ہوائی اڈے پر آذربائیجان کے وزیر خارجہ جیہون بیراموف،پاکستانی سفیر قاسم محی الدین اور سفارتی عملے نے وزیر اعظم کا استقبال کیا۔ شہباز شریف ، ترکیہ کے صدر رجب طیب اردوان اور آذربائیجان کے صدر الہام علییوف کے ہمراہ سہ فریقی اجلاس میں شرکت کرینگے ۔
راولپنڈی،تہران (خصوصی نیوز رپورٹر،اے پی پی)فیلڈ مارشل سید عاصم منیر نے جنرل سٹاف ہیڈ کوارٹرز تہران کا دورہ کیا۔منگل کو آئی ایس پی آر سے جاری بیان کے مطابق فیلڈ مارشل عاصم منیر نے ایرانی مسلح افواج کے چیف آف جنرل سٹاف میجر جنرل محمد باقری سے ملاقات کی۔دونوں ممالک کی افواج کے سربراہوں نے دوطرفہ دفاعی تعلقات کو مضبوط بنانے پر خصوصی توجہ مرکوز کرتے ہوئے علاقائی سلامتی کے بدلتے ہوئے منظر نامہ پر بات چیت کی جس میں باہمی دلچسپی کے کلیدی شعبوں میں ملٹری ٹو ملٹری تعاون کو بڑھانا، مشترکہ سرحد پر سکیورٹی میکانزم کو بہتر بنانا اور سرحدی علاقوں کو تجارتی اور اقتصادی رابطوں کے زونز میں تبدیل کرنے کے راستے تلاش کرنا شامل ہیں جس سے علاقائی استحکام اور خوشحالی میں مدد ملے گی۔ فیلڈ مارشل عاصم منیر کی آمد پر پرتپاک استقبال کیا گیا ۔ایرانی مسلح افواج کے چاق و چوبند دستے نے گارڈ آف آنر بھی پیش کیا۔فیلڈ مارشل دوست ممالک کے سرکاری دورے پر وزیراعظم کے وفد کے ہمراہ ہیں۔
