لاہور کو انفارمیشن ٹیکنالوجی کا حب بنا دیں!

حکومت نے ایک کروڑ نوکریاں دینی ہیں‘ تو اسے چین کا انڈسٹریل نیٹ ورک کلسٹرنگ ماڈل اپنانا ہو گا۔ یہ انتہائی دلچسپ ماڈل ہے۔ اس ماڈل کے تحت آج چین نے مختلف چیزوں کے الگ الگ شہر بسا دئیے ہیں‘ مثلاً: ایک موبائل فون بنانے میں کئی چیزیں درکار ہوتی ہیں‘ جن میں سکرین‘ کی پیڈ‘ بیٹری‘ باڈی‘سافٹ ویئر‘سرکٹ بورڈ وغیرہ شامل ہوتے ہیں۔ یہ تمام چیزیں چین کے مختلف شہروں میں نہیں‘ بلکہ ایک ہی شہر شین زن میں بنتی ہیں۔ یہاں کئی فیکٹریاں ایسی ہیں جہاں صرف ٹچ سکرینیں بن رہی ہیں‘ اسی طرح درجنوں فیکٹریاں صرف بیٹریاں بنا رہی ہیں‘ اس طرح مقامی صنعت وسعت پاتی ہے اور روزگار تیزی سے پھیلتا ہے۔ دنیا کی بات کریں تو امریکہ کا شہر ڈیٹرائٹ موٹر سٹی کہلاتا ہے‘ یہ آٹو پارٹس بنانے کے لئے مشہور ہے۔ اسی طرح نیویارک کو فنانشل سیکٹر مانا جاتا ہے۔یہ پوری دنیا کا فنانس حب ہے‘ جبکہ سان فرانسسکو ٹیکنالوجی حب یا سیلی کون ویلی کے نام سے معروف ہے۔ پاکستان میں بھی اس قسم کی کلسٹرنگ کسی نہ کسی شکل میں موجود ہے‘ مثلاً: پنکھوں‘ واشنگ مشینوں وغیرہ کے لئے گوجرانوالہ اور فیصل آباد مشہور ہیں‘ جبکہ کھیلوں کے سامان کے لئے سیالکوٹ کا نام ذہن میں آتا ہے‘ لیکن کیا کسی نے کبھی سوچا ہے کہ اکیسویں صدی کا ایک چوتھائی گزرنے کو ہے اور جب دنیا چاند پر سیروتفریح کے لئے عام مسافر بھیج رہی ہے‘ وہاں پاکستان انفارمیشن ٹیکنالوجی کے شعبے میں کہاں کھڑا ہے؟

آئی ٹی کے لئے اگر اب تک سرکاری سطح پر کوئی کام ہوا ہے اور کوئی نام سامنے آتا ہے‘ تو وہ پنجاب آئی ٹی بورڈ کا ہے۔ اس کے علاوہ کسی کے ذہن میں کوئی نام آتا ہے‘ تو مجھے بتا دے۔ بلوچستان اور سندھ میں آئی ٹی بورڈ نام کی کوئی چیز نہیں۔ اگر ہے‘ تو صرف نمائشی حد تک ۔ کے پی کے میں کے پی کے آئی ٹی بورڈ‘ بھی پنجاب نے ہی بنا کر دیا‘ تاہم یہ ابتدائی سٹیج پر ہے۔ پنجاب آئی ٹی بورڈ نے وسیع پیمانے پر کام کیا ہے اور منظر پر نمایاں ہے۔ یہ درجنوں ناممکن منصوبے مکمل کر چکا ہے‘ مثلاً:کمپیوٹرائزڈ فرد کا اجراجس سے پٹوار سسٹم کا خاتمہ ہوا اور پٹواری سے لوگوں کی جان چھوٹی‘تمام تھانے کمپیوٹرائز ہوئے‘تمام سرکاری سکول آن لائن ہوئے‘ جس سے گھوسٹ سکولوں کا خاتمہ ہوا‘سرکاری ہسپتالوں میں ادویات کی فراہمی کا مرکزی ریکارڈ سسٹم کا اجرا‘جس کے تحت جس سرکاری ہسپتال میں ادویات کا تیس فیصد سٹاک رہ جائے ‘تو سسٹم خودکار طریقے سے مزید ادویات آرڈر کر دیتا ہے‘ اسی طرح بچوں کو ویکسی نیشن لگانے کے لئے مانیٹرنگ نظام کا قیام‘ای سٹامپ پیپرز کا اجرا جس سے جعلی اور پرانی تاریخوں والے بوگس سٹامپ پیپرزکا خاتمہ ممکن ہوا ‘ کلاس رومز میں پڑھانے کیلئے ڈیجیٹل بورڈز کا آغاز وغیرہ وغیرہ ۔ اسی طرح پنجاب نے ہی دیگر صوبوں کو آئی ٹی کی جدید سہولیات مہیا کیں۔ کے پی کے میں جب ناصر خان درانی آئی جی تھے تب پی آئی ٹی بی نے کے پی پولیس کے لئے جدید نظام بنا کر دیا تھا‘ جس پر ناصر درانی نے چیئرمین پی آئی ٹی بی ڈاکٹر عمر سیف کو شکریے کے طور پر ایک عدد شیلڈ اور تہنیتی خط بھیجا تھا۔وزیراعظم عمران خان نے موجودہ دور میں ناصر درانی کو پنجاب پولیس میں ریفارمز لانے کے لئے وزیراعلیٰ کا مشیر مقرر کرنے کا اعلان کیا ہے۔ درا نی صاحب سے بہتر کون پی آئی ٹی بی کی کارکردگی سے واقف ہو گا‘ تاہم آئی ٹی میں قومی سطح پر کئی گنا زیادہ کام ہونا باقی ہے۔ تحریک انصاف کو مرکز‘ پنجاب اور کے پی میں حکومت مل چکی ہے۔ اس موقع کا بھرپور فائدہ اٹھانا چاہئے۔ پنجاب آئی ٹی بورڈ لاہور کی پرشکوہ بلند عمارت ارفع سافٹ ویئر ٹیکنالوجی پارک میں واقع ہے۔یہاں درجنوں ملکی و غیر ملکی آئی ٹی کمپنیوں کے دفاتر بھی ہیں۔ اس لحاظ سے حکومت اگر لاہور کو سیلی کون ویلی کی طرز پر ٹیکنالوجی کا حب ڈکلیئر کر دے ‘تو اس کے بے شمار فائدے ہوں گے؛چونکہ پورے پاکستان میں سرکاری سطح پر آئی ٹی کا اسی فیصد کام پی آئی ٹی بی نے کیا ہے اور یہ لاہو رمیں واقع ہے‘ تو اس طرح لاہور خطے میں انفارمیشن ٹیکنالوجی کا گڑھ بن سکتا ہے اور اس سلسلے میں کئے گئے تمام اقدامات کو بورڈ کے ماہرین کی معاونت اور تائید بھی حاصل ہو گی۔ دوسرا یہ کہ ارفع سافٹ ویئر پارک جیسے مزید ٹاور اور ہائی ٹیک انڈسٹریل زونز فوری طور پر بنائے جانے چاہئیں‘ جہاں ملکی و غیر ملکی آئی ٹی کمپنیاں‘ کال سنٹرز‘ سافٹ ویئر ہائوسز‘ ڈیٹا سنٹرز اورسٹارٹ اپس اپنے دفاتر شروع کر سکیں۔ سٹارٹ اپ ایسی جگہ ہوتی ہے ‘جہاں نوجوان اپنا آئیڈیا عملی طور پر ڈھال سکتے ہیں۔ یہاں انہیں تیز ترین انٹرنیٹ‘ لیپ ٹاپس‘ مسلسل بجلی ‘ایئرکنڈیشنڈ ماحول اور ماہرین کی خدمات حاصل ہوتی ہیں۔ پاکستان میں سرکاری سطح پر سٹارٹ اپ کا پہلا منصوبہ پلان نائن تھا جو ارفع سافٹ ویئر پارک میں شروع ہوا اور جہاں سے اب تک نوجوانوں کے ڈیڑھ سو سے زائد گروپس اپنے منصوبے مکمل کر کے کروڑوں ڈالر کی کمپنیوں میں تبدیل ہو چکے ہیں۔

تیسرا یہ کہ فوری طور پر فری لانسنگ کے لئے سرکاری سطح پر پالیسی بنائی جائے۔ فری لانسنگ کے ذریعے کوئی بھی شخص کہیں بھی بیٹھ کر صرف انٹرنیٹ اور کمپیوٹر کی مدد سے کام کر کے لاکھوں روپے ماہانہ کما سکتا ہے۔بدقسمتی سے پاکستان میں فری لانسنگ سے کم لوگ آگاہ ہیں‘ جبکہ فلپائن جس کی آبادی دس کروڑ ہے‘ وہاں پندرہ لاکھ شہری فری لانسنگ سے اربوں کا زرمبادلہ کما رہے ہیں۔پاکستان میں ایک اندازے کے مطابق صرف ڈیڑھ لاکھ فری لانسرز کام کر رہے ہیں ۔ اگر حکومت سرکاری و نجی تعلیمی اداروں میں فری لانسنگ کو لازمی یا آپشنل کورس کے طور پر لاگو کر دے تو چند ہی مہینوں میں لاکھوں نوجوان برسرروزگار ہو سکتے ہیں۔طالب علم پارٹ ٹائم کام کر کے اپنا خرچ خود اٹھا سکتے ہیں‘خواتین گھر بیٹھے معقول آمدنی کما سکتی ہیں‘ جبکہ بے روزگار افراد فل ٹائم فری لانسنگ سے دیگر لوگوں کو بھی کام دے سکتے ہیں۔ وزیراعظم عمران خان نے ایک کروڑ نوکریوں کا جو وعدہ کیا ہے‘ اس کے لئے انفارمیشن ٹیکنالوجی کا شعبہ فیصلہ کن کردار ادا کر سکتا ہے۔ اس شعبے میں بہت زیادہ سرمایہ کاری بھی درکار نہیں اور اس کے نتائج بھی جلد اور نفع بخش ہیں۔اسی طرح پاکستان سافٹ ویئر ایکسپورٹ بورڈ کو بھی آن بورڈ لینے کی ضرورت ہے۔ اس وقت موبائل ایپ ڈویلپمنٹ کا رجحان بہت فروغ پا رہا ہے۔پاکستان میں ساڑھے بارہ کروڑ افراد کے پاس موبائل کنکشن موجود ہیں۔اب کالیں کم اور ڈیٹا کا استعمال زیادہ بڑھ گیا ہے۔ لوگ فون کرنے کی بجائے سوشل میڈیا اور موبائل ایپلی کیشنز کا استعمال زیادہ کر رہے ہیں۔ پیسے بھیجنے اور چیزوں کی خریدو فروخت‘ حتیٰ کہ بکروں‘ قصائیوں اور ٹیکسیوں کی بکنگ تک موبائل سے ہو رہی ہے۔ یہاں تک کہ یوٹیوب گلوبل ٹیوشن سنٹر کا درجہ حاصل کر چکا ہے ‘جہاں ہر شعبے کا علم اور معلومات ویڈیوز کی شکل میں موجود ہیں اور بچوں سے لیکر بڑوں تک سبھی اس سے استفادہ کر رہے ہیں۔

پاکستان میں باسٹھ فیصد آبادی‘ یعنی بارہ کروڑ سے زائد افراد تیس سال سے کم عمر کے نوجوان اور بچے ہیں۔ انہی نے مستقبل سنبھالنا ہے۔ ان میں بے انتہا پوٹینشل موجود ہے۔ یہ آئی ٹی کی باریکیاں بھی جلد سمجھ جاتے ہیں۔ پوری دنیا میں آئی ٹی کا دور دورہ ہے۔ ٹی وی کی جگہ یوٹیوب لے رہا ہے۔ فیکس اور لینڈ لائن فون پہلے ہی متروک ہو چکے۔ آہستہ آہستہ بینکوں کی برانچزاور عملہ بھی کم ہوجائے گا۔آج بھی صرف پاکستان میں ایک ارب روپے سے زیادہ کی آن لائن ٹرانزیکشنز ہو رہی ہیں۔ وہ زمانے گئے جب لوگ بینکوں میں جا کر بیلنس اور سٹیٹمنٹ مانگا کرتے تھے۔ آہستہ آہستہ کیش ختم اور بٹ کوائن جیسی کرنسیاں ان کی جگہ لے لیں گی۔سوال یہ ہے کہ کیا ہم نے اس وقت کیلئے خود کو تیار کر لیا ہے؟ آئی ٹی میں کتنا پیسہ ہے اس کا اندازہ اس سے لگا لیں کہ بھارت کی صرف ایک آئی ٹی کمپنی انفوسس کا سالانہ ریونیو پندرہ ارب ڈالر ہے‘ جو ہماری کل سالانہ برآمدات کے برابر ہے۔اگر بھارت یہاں تک جا سکتا ہے‘ تو پاکستان کیوں نہیں؟بھارت میں بنگلور آئی ٹی کی سیلی کون ویلی ہے‘ جہاں مائیکروسافٹ‘ ایپل‘ گوگل‘ فیس بک‘سام سنگ اور ایمزون جیسی ٹریلین ڈالر کمپنیوں کے دفاتر بن چکے ہیں۔ لاہور آئی ٹی کا حب بن گیا‘ تو یہاں بھی یہ کمپنیاں سرمایہ کاری کریں گی‘ یہاں بھی لاکھوں نوکریاں نکلیں گی اور اربوں ڈالر کا زرمبادلہ یہاں بھی آسکے گا‘ کیا یہ سودا مہنگا ہے؟