نئے دور کے انسان کا المیہ کیا ہو گا؟

مستقبل قریب میں انسانی سماج کو ایک نئی قسم کی عدم مساوات کا خطرہ درپیش ہے۔ یہ حیاتیاتی عدم مساوات ہے، جو ہمارے سماج میں ایک نئی اور خوفناک قسم کی طبقاتی تقسیم پیدا کرے گی۔ ایسا بائیو ٹیکنالوجی اور عالمی اشرافیہ کے اشتراک سے ہو سکتا ہے۔ اس نئے نظام میں عام آدمی بالکل ہی بے بس اور بے کار ہو جائے گا؛ چنانچہ انسان کو اب ایک نئی لڑائی درپیش ہے۔ یہ خوفناک صورت حال ہے۔ اس صورت حال کی وضاحت کرتے ہوئے پروفیسر حریری اپنی نئی کتاب میں لکھتا ہے کہ گزشتہ چند عشروں کے دوران پوری دنیا میں لوگوں کو بتایا گیا کہ بنی نوع انسان معاشی و سماجی مساوات کی طرف گامزن ہے۔ اس کے ساتھ یہ بھی بتایا جاتا رہا کہ عالمگیریت اور جدید ٹیکنالوجی ہمیں اس منزل تک پہنچائے گی۔ مگر آثار یہ ہیں کہ اس منزل پر لے جانے کے بجائے شاید اکیسویں صدی ہمیں انسانی تاریخ کے سب سے زیادہ غیر مساوی سماج کی طرف لے جا رہی ہے۔ اگرچہ عالمگیریت اور انٹرنیٹ مختلف ممالک کے درمیان موجود خلیج کو پاٹ رہے ہیں، مگر اس کے ساتھ ساتھ وہ مختلف طبقات کے درمیان تضادات کو بھی ابھار رہے ہیں۔ اور بظاہر ایسا لگتا ہے کہ دنیا عالمگیریت اور عالمی اتحاد کی طرف بڑھ رہی ہے، مگر اس کے ساتھ ساتھ ایسے عناصراور عوامل بھی نمایاں ہیں، جن سے لگتا ہے کہ یہ نسل بائیولوجیکل کاسٹ یعنی حیاتیاتی ذاتوں میں تقسیم ہو جائے گی۔

ہماری اس دنیا میں عدم مساوات کا آغاز پتھر کے زمانے سے ہوا تھا۔ تیس ہزار برس پہلے شکار پر گزارا کرنے والا انسان اپنے پسندیدہ افراد کو مرنے کے بعد ہاتھی دانت اور دوسری قیمتی اشیا کے ساتھ دفن کرتا تھا۔ مگر عام لوگوں کے حصے میں خالی قبر ہی آتی تھی۔ اس کے باوجود شکار کے زمانے کا انسان کسی بھی دوسرے سماج سے زیادہ مساوات پسند اور یک طبقاتی تھا۔ اس کی وجہ یہ ہے کہ اس کے پاس بہت کم جائیداد ہوتی تھی۔ اور طویل مدتی عدم مساوات کے لیے جائیداد کا ہونا بنیادی شرط ہے۔

زرعی انقلاب کے بعد نجی ملکیت میں کئی گناہ اضافہ ہوا ، اور اس کے ساتھ عدم مساوات بھی بہت بڑھ گئی۔ انسان نے زمین، درخت اور اوزار کی نجی ملکیت حاصل کرنی شروع کی ، جس سے سخت قسم کا طبقاتی اور مراتب وار یعنی ہائرارکی نظام وجود میں آیا۔ اشرافیہ کے ایک چھوٹے سے گروہ نے دولت پر نسل در نسل اجارہ داری کا نظام قائم کر لیا۔ عام آدمی نے اس نئے بندوبست کو فطری بلکہ آسمانی حکم کے طور پر قبول کر لیا۔ پادریوں، شاعروں اور فلسفیوں نے پوری دنیا میں انتہائی صبر آزما انداز میں یہ وضاحت پیش کرنی شروع کی کہ انسانی جسم کی طرح معاشرے کے سب افراد برابر نہیں ہو سکتے۔ پائوں کو سر سے نیچے رہ کر ہی چلنا ہوتا ہے۔ مگر وقت کے ساتھ ساتھ یہ سوچ بھی بدلی۔

جدید دور میں مساوات تقریباً ہر ایک انسانی سماج کے لیے ایک مثالی آدرش بن گئی۔ اس کی ایک بڑی وجہ لبرل ازم اور کمیونزم کے نئے نظریات تھے، اور دوسری بڑی وجہ صنعتی انقلاب تھا، جس نے عام آدمی کو بہت بڑی اہمیت بخش دی۔ چونکہ صنعتی معیشت کا دار و مدار عام آدمی پر تھا، اور صنعتی دور کی فوجوں کا انحصار عام سپاہیوں پر؛ چنانچہ آمریتوں اور جمہوریتوں‘ دونوں نے عوام کی صحت، تعلیم اور فلاح و بہبود پر خرچ کرنا شروع کیا۔ عوام پر یہ وسائل انہوں نے اس لیے خرچ کرنے شروع کیے کہ ان کو پیداوار کے لیے لاکھوں صحت مند ہاتھوں اور دماغوںکی ضرورت تھی، جو ان کی فیکٹریوں اور ملوں کو چلا سکیں۔ اس کے ساتھ ساتھ مورچوں میں لڑنے کے لیے لاکھوں صحت مند سپاہیوں کی ضرورت تھی۔

اکیسویں صدی کی ابتدا میں لوگوں کو توقع تھی کہ سماج میں مساوات کے فروغ کا عمل تیز ہو گا۔ خصوصاً ان کا خیال تھا کہ عالمگیریت سے خوش حالی آئے گی ، جس سے تیسری دنیا کے غریب ممالک کو بھی وہ مواقع اور مراعات مل جائیں گی، جو فن لینڈ اور کینیڈا جیسے ممالک کے لوگوں کو حاصل ہیں۔ ایک پوری نسل یہ وعدہ سنتے ہوئے پروان چڑھی۔

مگر اب ایسے لگتا ہے کہ یہ وعدہ شاید پورا نہ ہو سکے۔ عالمگیریت نے سماج کے ایک بڑے حصے کو ضرور فائدہ پہنچایا، مگر سماج کے اندر اور مختلف سماجوں کے درمیان عدم مساوات میں بہت زیادہ اضافہ کر دیا ہے۔ کچھ لوگوں نے عالمگیریت کے فوائد دونوں ہاتھوں سے سمیٹے ہیں، جبکہ دوسری طرف کروڑوں لوگوں کو اس سے کوئی فائدہ نہیں ہوا، اور وہ خوشحالی کی اس دوڑ میں بہت پیچھے رہ گئے ۔ آج دنیا کے ایک فیصد امیر دنیا کی نصف دولت کے مالک ہیں‘ اور اس بھی بڑی خطرناک بات یہ ہے کہ دنیا کے ایک سو امیر لوگوں کے پاس چار ارب لوگوں سے زیادہ دولت ہے۔

یہ صورت حال مزید خراب ہو سکتی ہے۔ دولت مند لوگ بائیو ٹیکنالوجی میں ترقی کا فائدہ اٹھا کر معاشی عدم مساوات کو حیاتیاتی عدم مساوات میں بدل سکتے ہیں۔ دولت مند اب تک اپنی دولت سے صرف سماجی رتبہ خرید سکتے تھے، لیکن ہو سکتا ہے کہ وہ جلد ہی زندگی خریدنے کے بھی قابل ہو جائیں۔ زندگی یعنی عمر میں اضافے کے لیے میڈیکل سائنس کا استعمال ایک مہنگا کام ہو گا ، جس سے صرف دولت مند استفادہ کر سکیں گے۔ غریب سائنس کی ان مہنگی اور کم یاب خدمات سے فائدہ نہیں اٹھا سکتا، جس سے ہو سکتا ہے انسان حیاتیاتی ذاتوں میں تقسیم ہو جائے۔ پوری انسانی تاریخ میں دولت مند اور اشرافیہ طبقات یہ سمجھتے رہے کہ وہ زیادہ با صلاحیت ہیں، اسی لیے تو ہر چیز ان کے کنٹرول میں ہے۔ لیکن ہم جانتے ہیں کہ یہ درست نہیں۔ ماضی کے ایک کسان اور شہزادے میں صلاحیتوں کے اعتبار سے کوئی فرق نہیں تھا۔ شہزادے کی برتری امتیازی قوانین اور نظام کی مرہون منت تھی؛ تاہم ہو سکتا ہے سال اکیس سو تک بائیو ٹیک کی وجہ سے امیر زیادہ ذہین اور تخلیقی ہو جائیں۔ ایک بار جب یہ فرق شروع ہو گیا تو اسے ختم کرنا مشکل ہو گا۔ اگر دولت مند لوگ اپنی بے تحاشا دولت سے اپنے لیے ایک خوبصورت تن اور بہترین دماغ خرید سکتے ہیں‘ اور اس کے استعمال سے امیر و غریب کا فرق بڑھ سکتا ہے‘ تو پھر سن اکیس سو میں دنیا ایک فیصد نا صرف دنیا کے امیر ترین لوگ ہوں گے ، بلکہ وہ خوبصورتی، تخلیقی صلاحیتوں اور صحت کے اعتبار سے بھی باقی اکثریت سے بہتر ہوں گے۔ اس طرح جب عام آدمی کی وہ اہمیت ختم ہو جائے گی، جو اسے آج حاصل ہے تو اس بات کے قوی امکانات ہیں کہ ریاست بھی عام آدمی کی صحت، تعلیم اور فلاح و بہبود پر اتنا خرچ نہ کرے جو آج ہو رہا ہے۔ تو پھرعام آدمی کا مستقبل چھوٹی سی اشرافیہ کے رحم و کرم پر ہو گا؟

ہو سکتا ہے فرانس‘ نیوزی لینڈ اور کچھ دوسری فلاحی ریاستیں پھر بھی عوامی بہبود کا کام جاری رکھیں، مگر امریکہ جیسی ریاستوں میں اس موقع سے فائدہ اٹھا کر لوگوں کی سہولیات کو واپس بھی لیا جا سکتا ہے۔ تیسری دنیا کے ترقی پذیر ممالک میں عام آدمی کی اہمیت کم ہونے سے عدم مساوات آسمان کو چھو سکتی ہے۔ اس کے نتیجے میں عالمگیریت دنیا میں اتحاد کے بجائے انسان کو مختلف درجوں میں تقسیم کر سکتی ہے۔ گویا عالمگیریت سرحدیں ہٹا کر دنیا کو افقی طور پر متحد کرے گی، مگر انسان کو عمودی طور تقسیم کر کے رکھ دے گی۔

بیسویں صدی میں صنعتی انقلاب سستے مزدور، خام مال ، اور منڈی کے لیے عام لوگوں پر انحصار کرتا تھا۔ لیکن اکیسویں صدی کی پوسٹ انڈسٹریل تہذیب آرٹیفیشل انٹیلی جنس یعنی مصنوعی ذہانت اور بائیو انجینئرنگ پر انحصار کرنا چاہتی ہے۔

حاصل کلام یہ ہے کہ بائیوٹیک اور بے تحاشا دولت کے امتزاج سے عالمی اشرافیہ مرضی کے مطابق اپنی تن سازی کر سکتی ہے۔ اپنی مرضی کی شکل و عقل اور تخلیقی صلاحیت حاصل کر سکتی ہے۔ اپنی مرضی کے جین کا انتخاب کر سکتی ہیں۔ اس طرح طبقہ اشرافیہ دنیا میں بے مثال اور لا محدود طاقت اور برتری حاصل کر سکتا ہے۔ بے تحاشا دولت کے استعمال سے ایک نیا طبقاتی سماج پیدا ہو سکتا ہے، جس میں عام آدمی کی وہ جگہ اور اہمیت نہیں ہو گی، جو صنعتی دور نے اسے بخشی تھی، یا جو آج اسے حاصل ہے۔

روزنامہ دنیا ایپ انسٹال کریں