بلوچستان کے گھائو کون بھرے گا؟

مستونگ میں ہزارہ کمیونٹی کا حالیہ قتل عام ماضی قریب میں شروع ہونے والے ایک ایسے سلسلے کی کڑی ہے جس کا انت پورے خطے میں بربریت کا بھیانک منظر پیش کررہا ہے۔ شام اور مشرقِ وسطیٰ میں ایک دوسرے سے مذہب کی بنیاد پر متصادم آمریتیں پاکستان میں بھی بے گناہ لوگوں کو اپنی پراکسی جنگ کا ایندھن بناتی چلی جارہی ہیں۔کیا یہ خونی کھیل کبھی ختم ہوگا یا مذہبی عقائد کو جواز بنا کر اس مظلوم قومیت کا ایک ایک بچہ قتل کر دیا جائے گا؟

گزشتہ دو سال کے دوران ہزارہ کمیونٹی کی نسل کُشی کا سلسلہ شدت پکڑ گیا ہے۔ دہشت گردی کے ہر واقعے کے بعد غم و غصے اور انتقام کی لہر ابھرتی ہے، دہشت گردوںکا نشانہ بننے والوں کے لاشے کوئٹہ کی سڑکوں پر رکھ کے دھرنے دیے جاتے ہیں، عورتیں اور بچے ان دھرنوں میں کئی کئی دن ٹھٹھرتے ہیں ، لواحقین اس امید میں آہ وبکا کرتے ہیںکہ شاید ان کے دکھوں کا کوئی مداوا ہوجائے، بے حس ریاست ان کے زخموں پر مرہم رکھ دے اور ان کے تحفظ کا کوئی بندوبست کردیا جائے۔ وزراء اپنے وفود کے ہمراہ مگر مچھ کے آنسو بہانے دھرنوں میں جاپہنچتے ہیں، متاثرین کے ''رہنمائوں‘‘ کے ساتھ ''افسوس‘‘ کرتے ہیں، فاتحہ پڑھتے ہیں اور سخت سکیورٹی میں ہونے والے ''مذاکرات‘‘ کی ''کامیابی‘‘ کے بعد دھرنے ختم کردیے جاتے ہیں۔ حکومتی نمائندگان سے مذاکرات کرنے والے ''ہزارہ کمیونٹی کے رہنمائوں‘‘ کا انتخاب بھی بلوچستان اور دوسرے نازک معاملات پر اصل اختیار رکھنے والے ریاستی ادارے کرتے ہیں۔ان رہنمائوں میں سے زیادہ تر کا تعلق مراعات یافتہ طبقے سے ہوتا ہے جن کی دولت اور جائیدادوں کو ریاستی تحفظ کی ضرورت ہوتی ہے اور بدلے میں انہیں بوقت ضرورت ریاست کے کام آنا پڑتا ہے۔ معاملات وقتی طور پر ٹھنڈے ہوجانے پرحکمران جعلی مسکراہٹوں کے ساتھ کیمروں کے سامنے خود کو ماہر ''اسٹیٹس مین‘‘ ثابت کرتے ہیں۔ کچھ وقفے کے بعد یہ قتل عام پھر سے شروع ہوجاتا ہے اور یہی ڈرامہ پھر رچایا جاتا ہے۔

فرقہ پرستوں کی حالیہ واردات کے بعد، پہلے کی طرح اس بار بھی پاکستان کے مختلف شہروں میں مظاہرے اور دھرنے دیے گئے لیکن اس احتجاج کا المیہ یہ ہے کہ اسے صرف ایک فرقے تک محدود کردیا گیا، اسی وجہ سے یہ احتجاج نہ تو وسیع عوامی حمایت حاصل کرسکے اور نہ ہی فرقہ وارانہ ظلم کے خلاف کوئی بڑی مزاحمتی تحریک ابھر سکی ۔ جب احتجاج پر کسی مخصوص فرقے کا لیبل لگ جائے تو دوسرے مذہبی مسلکوں سے تعلق رکھنے والے محنت کش اور نوجوان شرکت سے گریز کرنے لگتے ہیں۔ ہزارہ کمیونٹی کے شہید ہونے والے زیادہ تر افراد کا تعلق بالادست طبقے سے نہیں تھا،غریب اور محنت کش طبقے کے عام لوگ دہشت گردی کی اس آگ میں جل رہے ہیں۔ بلوچستان سمیت پورے ملک کی ترقی پسند پارٹیوں، ٹریڈ یونینز اورطلبہ تنظیموں کو اس بربریت کے خلاف عام ہڑتال کروانے کی ضرورت ہے۔ دھرنوں میں بیٹھے بچوں اور خواتین کے دکھ میں بے حس حکمران کارروائیاں نہیں کیا کرتے۔سرمایہ دار حکمرانوں کی ترجیح ہی یہ ہوتی ہے کہ بس کاروباری زندگی میں خلل نہ پڑے، باقی جو چاہے ہوتا رہے۔دھرنوں سے حکمران طبقات کے مفادات کو براہ راست ضرب لگتی ہے نہ ہی انہیں کوئی مالی نقصان اٹھانا پڑتا ہے۔اس کے برعکس ایک فیکٹری میں بظاہر معمولی نظر آنے والی ہڑتال بھی ان کے لیے اقتصادی طور پر ناقابل برداشت ہوتی ہے جبکہ عام ہڑتال ان سیاسی بیوپاریوں کے مالی مفادات پر ایسی کاری ضرب لگاتی ہے کہ یہ گھٹنے ٹیکنے پر مجبور ہوجاتے ہیں۔

اگر ''ترقی پسند پارٹیوں‘‘ کی بات کی جائے تو بلوچستان میں ایک ترقی پسند پارٹی ہی اپنی مخلوط حکومت قائم کرکے ریاست کو سہارا فراہم کررہی ہے۔ اگر بائیں بازو کے اصلاح پسندوں کو لینن کی کتاب ''ریاست اور انقلاب‘‘ پڑھ کر بھی اس نظام زر کی سیاست اور ریاست کی سمجھ نہیں آئی تو کم از کم اس تجربے سے ہی کچھ سیکھا جاسکتا ہے جو اقتدار میں آنے کے بعد حاصل ہوا ہے۔''مسنگ پرسنز‘‘ کے معاملے میں ڈاکٹر مالک اپنی بے بسی کا اظہار کئی بار سر عام کر چکے

ہیں۔ اب اس بہیمانہ قتل و غارت گری کے بعد کیا ان کو اس وزارت اور اقتدار سے مستعفی نہیں ہوجانا چاہئے تھا؟ قدیم یونانی کہاوت ہے کہ دیوتا جنہیں تباہ کرنا چاہتے ہیں، پہلے ان کی عقل چھین لیتے ہیں۔ بائیں بازو کے اصلاح پسندوں کو یہ بات سمجھ نہیں آسکتی کہ ایک بحران زدہ گلے سڑے اقتصادی نظام میں ''جمہوری اقتدار‘‘ محض سیاست دانوں کی عیاشی کا سامان ہوتا ہے ، اصل طاقت ان اداروں کے پاس ہوتی ہے جو جبر کی قوت رکھتے ہیں۔ جن بنیادوں اور جتنے ووٹوں سے یہ ترقی پسند حضرات بلوچستان میں مسند اقتدار پر براجمان ہوئے ہیں، بھلا کیسے ممکن ہے کہ وہ ریاست پر کسی قسم کا دبائو ڈال سکیں؟ ویسے بھی ساری زندگی اقتدار کے لیے ترسنے والے برسر اقتدار آنے کے بعد اپنے محسن پر کیا حکم چلائیں گے!

اس متروک نظام اور اس کی مفلوج ریاست نے بلوچستان کی پسماندگی کو مٹانے کے بجائے مزید بگاڑ دیا ہے۔ جدید انفراسٹرکچر کی تعمیر تو دور کی بات اس خطے کے باسیوں کو تو 17ویں صدی کا معیار زندگی بھی فراہم نہیں کیا جاسکا۔ بلوچستان کا سماج قدیم قبائلی نظام سے لے کر نیم جاگیرداری، نیم تجارتی سرمایہ داری اور مسخ شدہ جدیدیت کا عجیب و غریب ملغوبہ بن چکا ہے۔ صدیوں کے تاریخی مدارج پر مشتمل یہ خطہ طرح طرح کی تفریقوں میں بٹا ہوا ہے۔ پاکستان کے حکمران طبقات معدنیات سے مالا مال اس سنگلاخ سرزمین کے وسائل کو تو دونوں ہاتھوں سے لوٹ رہے ہیں لیکن یہاں کے باسیوں کو علاج، تعلیم، صحت بخش خوراک اور پانی جیسی بنیادی ضروریات زندگی فراہم نہیں کرسکے۔ مقامی حکمرانوں کے علاوہ مختلف ممالک کی ملٹی نیشنل اجارہ داریوں نے بھی بلوچستان کو گدھوں کی طرح نوچا ہے ۔ اس بے دریغ لوٹ مار نے نہ صرف غریب طبقات کی ذلت میں اضافہ کیا ہے بلکہ بلوچستان کے عوام میں قومی محرومی کے جذبات زیادہ شدت سے سلگنے لگے ہیں۔ بلوچستان میں جاری ملکی اور سامراجی آقائوں کی لوٹ مار ہی اس پراکسی جنگ کی اہم وجہ ہے جو یہاں کے عوام کو تاراج کررہی ہے۔اس کے علاوہ فرقہ واریت کو ہوا دے کر استحصال اور ریاستی جبر کے خلاف بلوچ عوام کی جدوجہد کو سبوتاژ کرنے کی کوشش کی جارہی ہے۔ایک طرف قانون نافذکرنے والے اداروں کے آپریشن جاری رہتے ہیں تو دوسری طرف عوام کے زخموں پر جمہوریت اور مصالحت کی نمک پاشی کی جاتی ہے۔

معاشرہ جب آگے کی جانب نہ بڑھ پارہا ہو تو جمود کا شکار ہو کر بدبودار ہوجاتا ہے اور جدیدیت کے عہد میں بھی پسماندگی ، سماجی شعور پر غالب آجاتی ہے۔فرقہ واریت پنپتی ہے، جرائم کی معیشت پھلتی پھولتی ہے اور غریب عوام مسلسل استحصال اور ظلم و بربریت کی اذیت سے دوچار رہتے ہیں۔ ہوائی باتیں اور جعلی پیکج استحصال اور قومی محرومی کے گھائو نہیں بھرسکتے۔کوئی بھی نظام اور اس کے حکمران اپنے ہی دیے ہوئے دکھوں کا ازالہ نہیں کرسکتے ۔ جلد یا بدیر ظلم سہنے والوں کو ہی ظالم کے ہاتھ سے تازیانہ چھیننا پڑتا ہے!

روزنامہ دنیا ایپ انسٹال کریں