پیکیج کا بوجھ

زرعی پیکیج پر بہت شور ہے۔ پروپیگنڈے کی یلغار ہے۔

ظاہری طور پر یہ پیکیج کسانوں کے احتجاج کے جواب میں نواز لیگ حکومت کی جانب سے کسانوں کی مانگوں کو تسلیم کرنے اور ان کے لیے ہمدردی کا ایک اظہار بنا کر پیش کیا جارہا ہے۔پروجیکٹوں اور پیکجوں کا ایک طویل سلسلہ شریف برادران نے مسلسل جاری کررکھا ہے۔ شعبے ان کے پسند کے ہیں اور ان سے زیادہ تر مستفید ہونے والے درمیانے طبقے کے کچھ حصے ان ہی کے سیاسی حمایتی گردانے جاتے ہیں۔ دوسری جانب مالیاتی سرمائے کی اس سیاست میں برائے نام ''اپوزیشن پارٹیوں‘‘ نے بھی اپنی سیاسی ساکھ میںبہتری اور زیادہ حصہ داری کے لئے تنقید کی مہم چلائی ہوئی ہے ۔پیپلزپارٹی سے لے کر تحریک انصاف تک، اس نام نہاد حزبِ مخالف نے زیادہ سے زیادہ جو ''سیاسی دانشمندی‘‘ کے مظاہرے کی بنیاد پر دلیل دی ہے وہ یہ ہے کہ بلدیاتی انتخابات پر اثر انداز ہونے کے لیے اس پیکیج کے341ارب روپے کو جائز و ناجائز طریقے سے استعمال کیا جائے گا۔ یہ دلیل کسی حد تک درست بھی ہے لیکن المیہ یہ ہے کہ اس زرعی پیکیج پر سیاسی پارٹیوں کے درمیان بحث اور کھینچا تانی سے ثابت ہوتا ہے کہ سیاسی اشرافیہ اس ملکی کی بھاری آبادی کی کیفیت‘ اذیت ناک مسائل اور ان کی درست تشخیص سے کتنے بے مہر اور لاعلم ہیں ۔ یہ صورتحال اس حقیقت کو بھی واضح کرتی ہے کہ جب سیاست نظریات سے خالی ہو جائے تو سماجی اور معاشی تجزیہ کاری کی اہلیت ہی دم توڑدیتی ہے۔

''عوام‘‘ ایک نہایت ہی مبہم اورسماجی تجزیے کا سطحی شبد ہے۔ آج کے حکمران اور ان کے دانشور بالکل بے خبر معلوم ہوتے ہیں کہ عوام کن طبقات میں بٹے اور جکڑے ہوئے ہیں، سماجی پرتوں اور حالاتِ زندگی میں کیا تبدیلیاں رونما ہورہی ہیں اور زرعی مسئلے سمیت دوسرے سماجی مسائل کی شکل کس طرح تبدیل ہوچکی ہے ۔ بیماری میں کون سی پیچیدگیاں پیدا ہوگئی ہیں جب یہی پتا نہیں تو درد کی اصل تشخیص اور پھر علاج کیسے ہوسکے گا؟ پہلے تو لفظ ''کسان‘‘ کا ہی جائزہ لیں۔ایک ایکڑ اراضی کا مالک بھی کسان کہلاتا ہے اور دس یا بیس ایکڑ کامالک بھی کسان ہی کہلوانا پسند کرتا ہے ۔ دولفظ ہیں: ''کسان ‘‘اور ''دہقان‘‘، فیض صاحب نے اپنی شاعری میںزیادہ دہقان کا لفظ استعمال کیا ہے۔ ایک کمیونسٹ ہونے کے ناتے وہ اس تفریق کو زیادہ بہتر سمجھ سکتے تھے۔

پچھلے چند سالوں میں جس بے ہودہ، بے ہنگم اور ظالمانہ انداز میں مالیاتی سرمائے نے دیہی زندگی میںسرایت کی ہے‘ اس سے نہ صرف طبقاتی تقسیم اور لین دین کے رشتے بھی پیسے کے کردار سے نہ صرف مجروع ہوئے ہیںبلکہ نہایت ہی سفاک ہو کر رہ گئے ہیں۔یہاں کی تاخیر زدہ اور گلی سڑی سرمایہ داری کے زہر نے ہر شعبے کی ہر پرت میں رچ بس کر پرانے طرز ِ پیداوار اورتبادلے کے رشتوں کو مسخ اور مجروح تو کیا ہے لیکن کسی زرعی انقلاب سے زراعت اور دیہی زندگی کو عمومی طور پر جدید خطوط پر نہ تو استوار کرسکی ہے، نہ ہی جدید انفراسٹرکچر اور سہولیات فراہم ہو سکے جس سے ایسے حالات جنم لیے جو دیہی سوچوں اور نفسیات کو جدید اور ترقی پسندانہ بنا سکتے۔ اس کے برعکس اسی مالیاتی سرمائے کی یلغار نے اتنا بگاڑ پیدا کردیا ہے کہ دیہی علاقے کی سماجی وثقافتی زندگی تلخ اور رجعت کا شکار ہو کر رہ گئی ہے۔ پسماندگی کی اس بحر میں موبائل فون سے لے کر جدید اوزار اور الیکٹرانکس متعارف تو ضرور ہوئے ہیں لیکن ان کی سرایت اتنی سطحی اور محدود تھی کہ اس سے دیہی سماجوں کے تضادات، لالچ اور'' زن،زر، زمین‘‘ کے تنازعات زیادہ بھڑک کر زندگی کو عذابِ مسلسل بنا رہے ہیں۔ اب وہ کلاسیکی دہقان تقسیم ہو کر دو قسم کی پرتوں میں بٹ گیا ہے ۔ کچھ اس دولت کے تسلط کے پیادے بنا دئے گئے ہیں لیکن دہقانوں کی اکثریت دیہاڑی دار مزدور بن کر رہ گئے ہیں۔ ان کی مشقت کی ذلت اس استحصال کی ظلمت کی عکاسی کرتی ہے جس میں اس دیہی معاشرے کو غرق کردیا گیا ہے۔

منافع خوری کے نشے میں دھت بہت سے کارپوریٹ کارٹلز نے بھی اس دیہی سماج کا لہو چوسنے کے لیے سرمایہ کاری کی ہے ۔ اس کے ساتھ ہی کئی طفیلی پرتیں پیدا ہوئی ہیںجوآڑھتیوں سے لے کر زرعی منڈیوں کے ان داتائوں پر مبنی ہیں۔ بہت سے مرحلوں سے گزرنے والی اس زرعی پیداوار کی ترسیل کے ہر مرحلے پر ایک نئے آڑھتی ‘ سود خور ‘ڈیلر‘ منڈی کے جغادری اور ٹھیکیدار کے ہاتھوں مزید ڈسی جاتی ہے ۔ پھر کھاد اور زرعی آلات کی اجارہ داریاں اپنا جبر مسلسل بڑھاتی رہتی ہیں۔ زرعی شعبے میں جو میکانائزیشن ہوئی ہے وہ نہ صرف ادھوری ہے بلکہ مسخ شدہ اور قلت زدہ ہے ۔ چھوٹے زمین کے ٹکڑے رکھنے والے کسان بھی اب کلاسیکی کسان نہیں رہے بلکہ مذکورہ بالا مافیائوں کے استحصال کی انتہائوں سے گزر کر اپنی روزی روٹی بھی پوری طرح حاصل نہیں کرسکتے۔

نواز شریف کے اس پیکیج سے بھی زیادہ مستفید یہ آڑھتی ‘ کھاد وغیرہ کے ڈیلر‘ سود خور‘ رسہ گیر اور منڈیوں کے بدمعاش ہی ہونگے جو مختلف ''سیاسی‘‘ پارٹیوں کے عہدیدار اور تھانہ کچہری میں اثرورسوخ رکھنے والے رسہ گیر ہیں۔ دوسری جانب اس پیکج سے ان زرعی سرمایہ داروں اور جاگیرداروں کے منافعوں میں بھی تیزی سے اضافہ ہوگا۔ ٹریکٹر، ہارویسٹر اور دوسرے زرعی آلات کو ٹھیکے پر چلانے والے بھی آمدن میں بہت اضافوں سے نوازے جائیں گے۔ اگر کسی کو نہ ہونے کے برابر اس پیکیج سے ملے گا بھی تو وہ بے زمین یا چھوٹے کسان یا سابقہ دہقان اور حالیہ دیہاڑی دار کھیت مزدور ہی ہوں گے، انہیں بھیک برابر مالی فائدہ بھی شاید ہی مل پائے گا۔

زرعی شعبے میں یہ ناکامی بنیادی طور پر اس پاکستانی سرمایہ داری کی بربادی کی علامت ہے جس میں انفراسٹرکچر، چاہے وہ جدید آبپاشی کا ہو یا پھر زرعی مشینری کا، پر سرمایہ کاری کے لیے سرمایہ اور وسائل ہی نہیں تھے ۔ نہ یہ ہی یہاں کا نااہل اور کرپٹ سرمایہ دار طبقہ گورے کے اس پیوند شدہ جاگیردارانہ نظام کا خاتمہ کرسکا ہے۔جس ریاست کو کارپوریٹ سرمایہ دار لوٹ کر دیوالیہ کر چکے ہیں اس سے زرعی انقلاب کی توقع محض خود فریبی ہے۔ لیکن تاریخ اپنے آپ کو ہو بہو اگر دہراتی نہیں ہے تو وہ پیچھے کی جانب بھی چل نہیں سکتی۔ اب دوبارہ ڈھوروں والے دہقانوں کا دور تو واپس آنے سے رہا۔ موجودہ کیفیت نے دیہات میںجس غلاظت‘لالچ‘ بیماری‘افلاس اور ذلت کو جنم دیا ہے اس میں انسان کا دم گھٹنے لگا ہے۔ دیہاتوںکا امن اور چین، خوشگوار ماحول اور تازہ فضا، مخلص رشتے اور اصول وعزت سب کے سب محض ماضی کے افسانے بن کر رہ گئے ہیں۔ لیکن اس اذیت کو ختم صرف ایک زرعی انقلاب کے ذریعے کیا جاسکتا ہے جس کے تحت تمام زرعی زمین پر کھیت مزدوروں کاجمہوری کنٹرول اور اشتراکی ملکیت ہو۔ زمینوں کی تقسیم کا مرحلہ کب کا گزر چکا ہے، اب بڑے فارموں پر جدید ترین مشینری اور ٹیکنالوجی سے کئی گنا زیادہ پیداوار ہوسکتی ہے۔ آج جبکہ اقوام متحدہ اور حکومت کے اپنے اعدادوشمار کے مطابق پاکستان کی 60 فیصد آبادی غذائی قلت یا نیم قلت کا شکار ہے تو یہ اس نظام کے منہ پر ایک تمانچہ ہے ۔ ایک منصوبہ بند معیشت میں پیداور اتنی زیادہ، اتنی سستی اور اتنی بہتات میں ہوسکتی ہے کہ بھوک، ننگ، افلاس اور محرومی کا خاتمہ ہوسکتا ہے۔ لیکن یہ زرعی انقلاب سرمایہ داری کے ذریعے نہیں ہو سکتا۔یہ حکمران طبقہ اس قابل تھا،نہ ہے اور ہو سکتا ہے۔ قومی جمہوری انقلاب کے دوسرے ادھورے فرائض کی طرح یہ زرعی انقلاب کا فریضہ بھی تاریخ نے تیسری دنیا میں سوشلسٹ انقلاب کے فرائض میں شامل کردیا ہے۔

روزنامہ دنیا ایپ انسٹال کریں