غیرت کے نام پر قتل

14 اگست کو پاکستان کی 'آزادی‘ کی سترویں سالگرہ کے موقع پر کراچی کی ایک پسماندہ کچی آبادی میں ایک نوجوان جوڑے، بخت تاج اور غنی رحمان، کو گھر سے بھاگ کر پسند کی شادی کرنے کے 'جرم‘ میں ان کے والدین اور مرد رشتہ داروں نے بجلی کے کرنٹ سے ہلاک کر دیا۔ قبائلی کمیونٹی کی تنگ نظری اور رجعتیت کے رد عمل کے خوف سے رحمان کے والد افضل، تاج کے والد حکمت سے ملے اور شادی کی تجویز دی اور ان کو راضی کرنے کے لیے 'سوارہ‘ کی بھی پیشکش کی (اپنے خاندان سے کسی لڑکی کو شادی کے لیے پیش کرنا)۔ اس نے اپنی دو بیٹیوں کو شادی کے لیے پیش کیا، تاج اور رحمان کی شادی کے تمام اخراجات اٹھانے اور ایک بیل دینے کا وعدہ بھی کیا۔ پریس رپورٹس کے مطابق تاج کے والدین نے افضل کے اس پیشکش کو قبول کر لیا۔ دونوں خاندانوں کے درمیان معاہدہ طے پا گیا‘ تاہم علی بروہی گوٹھ، شیرپائو کالونی اور مسلم آباد میں مقیم قبیلے کے درجن بھر سے زائد عمائدین نے 15 اگست کو معاملے کے حل کے لیے جرگہ بلایا۔ ایک رجعتی 'بزرگ‘ سرتاج خان عرف شاگلئی نے معاہدے کو مسترد کر دیا‘ اور جرگے پر حاوی ہو کر والدین کو اپنے ہی بچوں کو قتل کرکے سزا دینے پر مجبور کیا تاکہ قبیلے اور خاندان کی 'عزت‘ کو بچایا جا سکے۔ مبینہ طور پر لڑکا اور لڑکی کے والدین نے اپنی جان کے خوف سے بچوں کو بے ہوش کرکے چارپائی سے باندھ کر بجلی کے جھٹکوں سے انہیں موت کی نیند سلا دیا‘ ان کی لاشوں کو رات کی تاریکی میں دفن کر دیا گیا۔ ان کی موت پر کسی طرح کی رسومات ادا نہیں کی گئیں۔ جب اس وحشیانہ جرم کا پتہ چلا تو بدھ 13 ستمبر کو قبر کشائی کرکے ان کی لاشیں نکالی گئیں۔ فرانزک تجزیے سے ان کے جسم پر تشدد اور کرنٹ کے نشانات پائے گئے۔ رپورٹس کے مطابق رحمان کا والد افضل فیصلے کے خلاف تھا‘ لیکن اس کے ایک رشتہ دار کے بقول جرگے کے ایک رکن نے اسے دھمکی دی کہ اگر اس نے فیصلہ تسلیم نہیں کیا تو اس کے آبائی علاقے میں ان کے خاندان کے باقی افراد کو برباد کر دیا جائے گا۔

جیسے جیسے یہ نظام معاشی بحران میں دھنستا جا رہا ہے اور بڑھتی ہوئی محرومی اور ذلت کے ساتھ سماجی بوسیدگی زیادہ ہوتی جا رہی ہے‘ ویسے ویسے غیرت کے نام پر قتل کے جرائم بھی روزانہ کی بنیاد پر اور تشویشناک انداز میں بڑھ رہے ہیں۔ ان ہولناک وحشتوں، جن میں زیادہ تر محکوم طبقات کی خواتین ہی نشانہ بنتی ہیں، کو روکنے میں ریاست کی ناکامی اور حکمران طبقات کی لاپروائی‘ ان کی بے توجہی اور تغافل سے ظاہر ہوتی ہے۔ یہ وحشیانہ عمل کسی دور افتادہ گائوں یا قبائلی علاقے میں نہیں‘ بلکہ پاکستان کے سب سے بڑے صنعتی اور نسبتاً جدید شہر کراچی میں ہوا۔

ایک جدید صنعتی شہر میں اس طرح کا رجعتی پسماندہ عمل دراصل پاکستانی سرمایہ داری کے سماجی‘ معاشی ارتقا کے مخصوص طرز کی پیداوار ہے۔ سب سے بڑھ کر یہ ریاست اور نظام کی ناکامی ہے۔ 1950ء کی دہائی کے اواخر سے دنیا کے نئے تھانیدار اور سامراج، امریکہ کی سربراہی میں نئی ابھرنے والی ملٹی نیشنل کارپوریشنوں نے نسبتاً وسیع صنعت کاری اور سرمایہ کاری کی۔ یہ دراصل بعد از جنگ ترقی یافتہ سرمایہ دارانہ ممالک میں معاشی ابھار کا نتیجہ تھا‘ جو 1970ء کی دہائی کے وسط تک جاری رہا۔ پاکستان کی معاشی نمو بھی نئی بلندیوں کو پہنچی اور 1960ء کی دہائی میں 9 فیصد تک پہنچ گئی۔

لیکن یہ معاشی نمو سماجی انفراسٹرکچر کے ارتقا سے مطابقت نہیں رکھتی تھی جو ایک نسبتاً مناسب طرز زندگی کے لیے لازمی ہوتی ہے۔ معاشی نمو دوسرے علاقوں سے آئے ہوئے مزدوروں، جن کی اکثریت غیر ہنرمند تھی، کی اجرتوں اور آمدنیوں سے بھی مطابقت نہیں رکھتی تھی۔ اس طرز ارتقا نے نئے تضادات کو جنم دیا جو ساٹھ کی دہائی کے اواخر میں ایک عوامی بغاوت کی شکل میں پھٹ پڑے جس میں اس نومولود پرولتاریہ نے اس وقت کی صنعتی اور سیاسی جدوجہد میں اپنے جوش و ولولے سے ایک انقلابی کردار ادا کیا۔ مختلف علاقوں سے تعلق رکھنے والے مزدور اس تحریک میں طبقاتی بنیادوں پر متحد تھے‘ اور قومی، لسانی، مذہبی، فرقہ وارانہ اور علاقائی تعصبات تقریباً ختم ہو چکے تھے‘ جبکہ آج کراچی کو انہی تعصبات نے چیر پھاڑ رکھا ہے۔ ستر کی دہائی میں پرولتاری جدوجہد کا مرکز کراچی کی ایک کالونی ہوتی تھی جہاں زیادہ تر پشتون مزدور اور ان کے خاندان رہتے تھے۔

جب طبقاتی جدوجہد زوال پذیر ہوئی اور سیاست اور سماج میں ریاست کی درپردہ قوتیں داخل ہوئیں، لسانی اور علاقائی تعصبات کو ہوا دی گئی‘ حکمران طبقات نے فرقہ وارانہ رجحانات کو پروان چڑھایا تاکہ مزدوروں کو تقسیم کرکے اپنے منافعے اور استحصال کو بڑھا سکیں۔ ضیاالحق کی آمریت نے بنیاد پرست رجحانات کو شہ دے کر سماج پر سیاہ رجعت مسلط کی۔ بعد میں آنے والی جمہوری حکومتوں نے مزدوروں کو تقسیم کرنے کی پالیسی جاری رکھی‘ اور ان کی حمایت حاصل کرنے کے لیے اپنی سیاست کی بنیاد علاقائی اور فرقہ وارانہ تعصبات پر رکھی۔ عوام کی روایتی سیاسی پارٹیوں اور اکثر ٹریڈ یونین قیادت نے یا تو مزدور تحریک سے غداری کی یا بیرون ملک پُرکشش ملازمتوں کے لیے چلے گئے۔ معاشی بحران مزید گمبھیر ہونے کی وجہ سے صنعتی منافعوں کا انحصار زیادہ سے زیادہ جرائم اور بھتہ خوری پر ہونے لگا۔ ان بھتہ خوروں، مافیا اور غنڈوں نے تنگ نظر قوم پرستی، لسانی اور فرقہ وارانہ تعصبات کا سہارا لے کر کراچی کی معیشت میں لوٹ مار کا بازار گرم کیے رکھا۔

اس ذلت سے نجات کے لیے ٹریڈ یونین اور طبقاتی جدوجہد کی غیر موجودگی میں سماج، ثقافتی اور معاشی بیگانگی کا شکار ہو گیا۔ ان حالات نے مزدوروں کو فرقوں اور علاقائی تعصبات کی سیاست کرنے والوں کی گود میں ڈال دیا۔ ان کمیونٹیز کے امیر لوگ ان کی قیادت‘ اور انہیں اپنے معاشی مفادات اور مقاصد کے لیے استعمال کرنے لگے۔ ان کا اہم ہتھیار‘ رجعتی، قومی، سماجی اور ثقافتی پسماندگیوں اور تعصبات کو اس طرح مسلط کرنا تھا کہ یہ کمیونٹی ان کی جاگیر بن جائے‘ جس سے وہ سیاست میں بلیک میلنگ اور اپنے غنڈوں کے ذریعے لوٹ مار کے لیے استعمال کر سکیں۔ ان بچوں کے بہیمانہ قتل کے ذمہ دار بھی وہی تنگ نظر قوم پرست، ثقافتی ڈون ہیں جنہوں نے اس جاگیر پر اپنی دولت اور طاقت کی بنیاد رکھی ہے۔ یہ عمل ایک ایسے عہد کا وقتی مظہر ہے‘ جہاں سطحی طور پر ایک نیم رجعت حاوی ہے اور مزدور تحریک ایک عارضی جمود کی حالت میں ہے۔

پاکستان کے اس طرز کے سماجی معاشی ارتقا کی 'مشترکہ اور غیر ہموار ترقی‘ کے مارکسی نظریے سے وضاحت کی جا سکتی ہے جسے لیون ٹراٹسکی نے پیش کیا تھا۔ پاکستان جیسا ایک پسماندہ یا نسبتاً قدیم سماج، ترقی یافتہ یا زیادہ جدید سماج کی ثقافت کے بعض خدوخال کو اپنا لیتا ہے اور ایک زیادہ جدید ثقافت بھی ایک زیادہ پسماندہ ثقافت کے بعض حصوں کو یا اپنا سکتی ہے یا اس میں مدغم ہو سکتی ہے‘ جو بعض اوقات مثبت یا منفی نتائج کے حامل ہو سکتے ہیں۔ مثبت اثرات کراچی میں مزدوروں کی بغاوت اور جدوجہد ہے۔ منفی اثرات آج کے سماجی بحران کے دور میں ثقافتی اور اخلاقی گراوٹ ہے جہاں عورت کو غیرت کے نام پر قتل کیا جاتا ہے اور فرقہ وارانہ تعصبات وحشت کو جنم دیتے ہیں۔ پسماندہ اور جدید ادوار سے تعلق رکھنے والی ثقافتی رسومات، ادارے، روایات اور طرززندگی بھی کسی ایک ملک میں مشترکہ، تقابلی اور غیرمعمولی انداز میں باہم جڑے ہوتے ہیں۔

اس بوسیدہ سماجی معاشی نظام کی بیماری کی علامات کراچی میں ہونے والے اس طرح کے واقعات ہیں۔ قانون اور انتظامی تبدیلیوں سے ان سماجی بیماریوں کا خاتمہ نہیں ہو سکتا کیونکہ یہ سب بحران زدہ نظام کی پیداوار ہیں۔ کراچی دوبارہ ابھرے گا۔ پاکستان کے پرولتاریہ کے اس گڑھ میں طبقاتی جدوجہد دوبارہ ابھرے گی۔ اگر یہ فتح مند ہوئی تو اس طرح کے رجعتی رجحانات کی بنیادوں کو ہی ختم کر دے گی جو سماج کو بربریت کی طرف لے جا رہی ہیں۔

روزنامہ دنیا ایپ انسٹال کریں