مفتی تقی عثمانی صاحب کی ’آسان تفسیرِ قرآن‘

رمضان المبارک کے بابرکت شب و روز میں، مفتی محمد تقی عثمانی صاحب کی ''آسان تفسیرِ قرآن‘‘ زیرِ مطالعہ ہے۔ مجھے خیال ہوا کہ قرآن مجید کے اپنے جیسے طالب علموں کو اس جانب متوجہ کروں۔

ہر علم کی طرح علمِ تفسیر میں بھی کئی مکاتبِ فکر ہیں۔ سب سے مقبول 'تفسیرِ ماثور‘ ہے۔ یہ روایات اور قدیم تفسیری اقوال کی روشنی میں قرآن مجید کی تفہیم ہے۔ اس کے حق میںدلیل یہ ہے کہ جو لوگ عہدِ رسالت سے قریب تر تھے، ان کا فہمِ قرآن زیادہ قابلِ بھروسہ ہے، اس لیے محفوظ راستہ یہی ہے کہ اس سے انحراف نہ کیا جائے، الا یہ کہ کوئی نیا مسئلہ اسے ناگزیر بنا دے۔ اسی لیے اسے 'تفسیر بالروایہ‘ بھی کہتے ہیں۔ ہمارے ہاں اکثر تفاسیر اسی مکتبِ فکر سے تعلق رکھتی ہیں۔ تفسیر ابنِ کثیر اس کی نمائندہ ہے۔

اردو زبان میں زیادہ تر تفاسیر، تفسیر ابنِ کثیر ہی کو سامنے رکھ کر لکھی گئیں جس میں ایسے آثار پائے جاتے ہیں جنہیں نسبتاً مستند سمجھا گیا ہے۔ اردو زبان میں مفتی محمد شفیع مرحوم کی تفسیر 'معارف القرآن‘ کی وہی حیثیت ہے جومجموعی تفسیری ادب میں تفسیر ابنِ کثیر کو حاصل ہے۔ 'آسان تفسیرِ قرآن‘ کو 'معارف القرآن‘ کا اگلا ایڈیشن یا اس کی توسیع سمجھنا چاہیے۔ 'معارف القرآن‘ اضافوں کے ساتھ، مولانا اشرف علی تھانوی کی 'بیان القرآن‘ کی تسہیل ہے جسے 'خلاصہ تفسیر‘ کے عنوان سے بیان کیا گیا ہے۔ مفتی تقی عثمانی صاحب نے کوشش کی ہے کہ جدید اردو نثر سے مانوس لوگوں کے لیے اس تفسیری روایت تک رسائی کو سہل بنا دیا جائے؛ تاہم، یہ محض تسہیل نہیں، اس میں اضافہ بھی ہے۔

یہ دراصل مفتی صاحب کے دروس کی تحریری صورت ہے۔ مولانا راشد حسین صاحب نے تقریر کو تحریرکی صورت دی۔ دروس میں جہاں کہیں کسی آیت، حدیث یا تفسیر وغیرہ کا ذکر آیا ہے تو اس کا حوالہ تلاش کرکے، اسے درج کر دیا ہے جسے تخریج کہتے ہیں۔ پھر مفتی صاحب نے اسے ایک سے زیادہ بار دیکھا اوراب یہ اس شکل میں ہمارے سامنے ہے کہ خود مفتی صاحب کے الفاظ میں 'گویا یہ خود میری لکھی ہوئی ہے‘ (پیش لفظ)۔ 'معارف القرآن‘ سے اس تفسیر کی ایک اور دلچسپ مماثلت یہ ہے کہ مفتی شفیع صاحب نے بھی پہلے ریڈیو کیلئے تفسیرِ قرآن کا آغاز کیا تھا جو سورہ ابراہیم ہی تک جاری رہ سکا۔ اس سے متاثر کچھ لوگوں کے اصرار پر، اس تفسیر کا خاکہ ابھرا، اگرچہ 'بیان القرآن‘ کی تسہیل پہلے ہی ان کے علمی منصوبوں میں شامل تھی۔

'آسان تفسیرِ قرآن‘ کے آغاز میں، اہم تفسیری معلومات کو یکجا کر دیا گیا جو مطالعہ قرآن سے پہلے قاری کے علم میں ہوں تو قرآن فہمی کا سفر آسان تر ہو جاتا ہے۔ جیسے وحی بحیثیتِ ذریعہ علم، وحی کی اقسام، تاریخِ نزولِ قرآن، تفسیرِ قرآن کے مآخذ۔ اس وقت تک، اس کی دو جلدیں ہی شائع ہو پائی ہیں جو سورہ فاتحہ اور سورہ بقرہ کی تفسیر پر مشتمل ہیں؛ تاہم اس کی تدوین کا سلسلہ جاری ہے۔

مفتی تقی عثمانی زبان کا اچھا ذوق رکھتے ہیں۔ صاحبِ دیوان شاعر بھی ہیں۔ یہ ذوق ان کے خاندان کا امتیاز ہے۔ یہی سبب ہے کہ اس تفسیر کی زبان آج کی اردو ہے جس نے اسے جدید پڑھے لکھے قاری کے لیے قدیم تفاسیر کے برعکس، مانوس بنا دیا ہے۔ مطالعے کے دوران اس کا بھی اندازہ ہوتا ہے کہ لکھتے وقت مفتی صاحب کے پشِ نظر جدید پڑھا لکھا قاری ہے، جسے قرآن مجید کے مضامین سے متعارف کرانا مقصود ہے۔ یہ قدیم بات کا جدید اسلوب میں بیان ہے۔ میںاس بات کو میں ایک مثال سے واضح کرتا ہوں۔

قرآن مجید میں قصہ آدم و ابلیس بیان ہوا ہے۔ الہامی لٹریچر میں اس قصے کی خاص اہمیت ہے۔ یہ بائبل میں بھی درج ہے۔ اس باب میں اہم ترین سوال یہ ہے کہ خلافت اور خلیفہ سے کیا مراد ہے؟ مفتی صاحب ایک طرف اس کو عمومی مفہوم میں لیتے ہیں اور دوسری طرف خصوصی مفہوم میں۔ وہ لکھتے ہیں کہ 'انی جاعل فی الارض خلیفہ‘ کا مطلب یہ ہے کہ میں زمین میں ایک ایسی نئی مخلوق پیدا کرنے والا ہوں جو زمین پہ میرے نائب کے طور پر میرے دیے ہوئے احکام کو نافذ کرے۔ اس کے مطابق دنیا کا نظام قائم کرے اور اس کے مطابق اپنی زندگی گزارے‘۔ (صفحہ 240)

خاص مفہوم میں، وہ اس خلافت کو انبیا تک محدود کرتے ہیں: ''اللہ تعالیٰ کی خلافت حضرت آدم سے شروع ہوئی اور حضور نبی کریمﷺ تک ہزاروں بلکہ لاکھوں انبیا اللہ تعالیٰ کے خلیفہ بن کر تشریف لائے، یہاں تک کہ اللہ تعالیٰ کی خلافت کا یہ سلسلہ حضور خاتم النبیینﷺ پر ختم ہوا۔ آپ آخری نبی بھی تھے اور آخری خلیفہ بھی‘‘۔ مفتی محمد شفیع مرحوم کا موقف بھی یہی ہے۔ قرآن مجید کے ایک طالب علم کے طور پر جب میں نے اس عام اور خاص مفہوم میں تطبیق پیدا کرنا چاہی تو مجھے مشکل پیش آئی۔

اگر نبیﷺ آخری خلیفہ ہیں تو بنی آدم کی خلافت کا مفہوم کیا ہوگا؟ کیا آج کا انسان اللہ کا خلیفہ نہیں ہے؟ پھر یہ کہ قرآن مجید میں کہیں اللہ نے کسی پیغمبر کواپنا خلیفہ نہیں کہا۔ پیغمبروں کو نذیر، بشیر، داعی الیٰ اللہ، سراجِ منیر جیسے القابات کے ساتھ متعارف کرایا گیا لیکن کہیں یہ نہیں فرمایا کہ پیغمبر خلیفہ بھی ہوتا ہے۔ پھر اس الٰہی فیصلے پر فرشتوں نے جو استفسار کیا، اس استدلال سے، اس کا جواب بھی نہیں ملتا۔ پیغمبر کسی طرح اس کا مصداق نہیں سمجھے جا سکتے۔ کیا ہی اچھا ہو کہ اگلے ایڈیشن میں خلافت سے متعلق اس نوعیت کے سوالات کو سامنے رکھتے ہوئے، اس میں ضروری اضافہ کردیا جائے۔ بعض دوسرے مفسرین کے نزدیک، خلیفہ سے مراد ایک 'صاحبِ اختیار مخلوق‘ ہے۔ اسے درست مان لیا جائے تو فرشتوں کے استفسار کے حوالے سے کوئی اشکال باقی نہیں ہوتا۔

مفتی صاحب بیان کرتے ہیں کہ شیطان کے انکار کی وجہ تکبر ہے لیکن وہ اس کی عقلی توجیہ بھی کرتا ہے کہ میں انسان سے برتر ہوں۔ یہاں سے مفتی صاحب یہ نکتہ پیدا کرتے ہیں کہ 'حکمِ خداوندی کے سامنے عقلی گھوڑے دوڑانا کافرانہ روش ہے‘ (صفحہ254)۔ قصہ آدم وابلیس کی زمین پر سکونت کے حوالے سے وہ قدیم مفسرین کی یہ رائے بھی نقل کرتے ہیں کہ 'اس میں اس طرف اشارہ کرنا مقصود ہے کہ میاں بیوی دونوں ایک جگہ رہ کر زندگی گزاریں اور حتی الامکان کوشش کریں کہ وہ ایک ساتھ سکونت اختیار کریں۔‘‘ اور ان آیات سے یہ بھی معلوم ہوتا ہے کہ کھانے میں میاں بیوی ایک دوسرے کے تابع نہیں ہیں۔‘

محترم مفتی صاحب نے تمہیدی مباحث میں پیغمبروں کی طرف آنے والی وحی کی اقسام کا ذکر کیا ہے لیکن اس میں خواب کو شامل نہیں کیا۔ اسی طرح سورہ بقرہ کی تعارف میں لکھا کہ صحابہ نے جب قرآن مجید کی سورتوں کو جمع کیا تو بقرہ کو فاتحہ کے بعد رکھا۔ اس سے یہ تاثر ملتا ہے کہ سورتوں کی ترتیب صحابہ کا اجتہادی فیصلہ تھا، درآں حالیکہ قرآن مجید کی آیات اور سورتوں کی ترتیب توقیفی ہے، یعنی اللہ تعالیٰ کی طرف سے طے کردہ ہے۔ اگلے ایڈیشن میں جملوں کی تدوینِ نو سے ان اشکالات کو دور کیا جا سکتا ہے۔

ان امور کی نشاندہی سے مقصود خدانخواستہ کوئی تنقید نہیں بلکہ ایک طالب علمانہ تاثر کا اظہار ہے۔ اس امید کے ساتھ کہ اگلے ایڈیشن میں مجھ جیسے کم فہم قاری کی ضروریات بھی حضرت مفتی صاحب کے پیشِ نظر رہیں۔ علوم القرآن، مقدمہ معارف القرآن اور قرآن مجید کے انگریزی ترجمے کے بعد، یہ حضرت مفتی صاحب کی بڑی خدمتِ قرآن ہے۔ اللہ تعالیٰ اسے مصنف اور قارئین کے لیے باعثِ خیر بنائے۔

روزنامہ دنیا ایپ انسٹال کریں