’’ابھی تو آسمان سرخ ہے‘‘

شہید انسپکٹر پولیس برادرم عادل شمشاد ایس ایچ او تھانہ قادرآباد تعینات تھا۔ ایک روز اُس نے مجھے فون کیا۔ بعداز مزاج پرسی اُس نے تھانہ قادرآباد کا تعارف یوں کروایا کہ تھانہ مذکورہ تقسیم پاک و ہند سے پہلے تعمیر شدہ‘ ضلع منڈی بہائوالدین کا سب سے قدیم تھانہ ہے۔ عادل شہید نے مزید بتایا کہ ایک دن وہ اپنے تھانہ کے محرر والے کمرے میں بیٹھا‘ پرانے مقدمات کی مثلیں دیکھ رہا تھا کہ ایک سکھ پولیس آفیسر کے ہاتھ سے لکھی ہوئی تین چار فقروں کی ایف آئی آر نے اُس کی توجہ اپنی طرف کھینچ لی۔

''امروز بتاریخ 13 اکتوبر1911ء بوقت پونے 3 بجے سہ پہر تھانے کے صحن میں موجود ہوں کہ منجانب شمال سرخ آندھی اٹھی ہے۔ لگتا ہے کہ تھانے کے علاقہ میں کوئی قتل ہو گیا ہے۔ نفری سمیت برائے تفتیش روانہ ہوتا ہوں‘‘... سروپ سنگھ (سب انسپکٹر) تھانہ قادرآباد

عادل شہید نے یہ بھی بتایا تھا کہ سرخ آندھی اٹھنے پر لکھی جانے والی اَن دیکھے قتل کی ایف آئی آر حرف بہ حرف سچ ثابت ہوئی‘ قتل بھی ہوا اور مذکورہ سادہ سی چار سطروں کے نتیجے میں گرفتار ہونے والے قاتلوں کو سزائے موت بھی ہوئی...

مجھے اچھی طرح یاد ہے کہ چند سال پہلے تک بھی سرخ آندھی چلنے سے آسمان کی رنگت سرخی مائل ہوتی تو بزرگ فرماتے کہ ''اللہ خیر کرے‘ کہیں خون ہوا ہے‘‘ اور پھر کچھ دیر تک کہیں نہ کہیں سے واقعی ایسی اطلاع مل جاتی اور آسمان کی سرخی سچ ثابت ہو جاتی۔ ماں جی فرمایا کرتی تھیں کہ ''انسان کو اللہ پاک نے بنایا ہے‘ جب اسے کوئی مار دیتا ہے تو اللہ پاک جلال میں آ جاتے ہیں۔ انہیں اپنی تخلیق کے کسی انسان کے ہاتھوں مٹنے پر غصہ چڑھ جاتا ہے۔ یہ آسمان اللہ پاک کے غصے سے سرخ ہوتا ہے‘‘...

تو پھر انسانوں کا قتل تو اب بھی جاری ہے مگر اب آسمان پر سرخی نظر کیوں نہیں آتی؟... کیا اب اللہ پاک کو غصہ نہیں آتا؟... کیا اب وہ رب جلال میں نہیں آتا؟... کیونکہ انسان تو اللہ تعالیٰ ہی کی تخلیق ہے۔ آسمان لازماً آج بھی سرخ ہوتا ہے... آج بھی لال آندھی چلتی ہے... مگر دیکھنے والی آنکھیں سفید ہو چکی ہیں... ان پر مفادپرستی‘ خودغرضی اور گناہوں کی ایسی چربی چڑھی ہے کہ ہمیں سرخ آسمان نظر نہیں آتا... یا پھر خون ہوا ہی اتنا ہے کہ ہم اس کے عادی ہو چکے ہیں اور اسی عادت کی وجہ سے ہمارا اپنا خون سفید ہو گیا ہے...

چند دن پہلے دہشت گردوں کے ہاتھوں جو خون بہایا گیا وہ ''لال سرخ‘‘ تھا... وہ معصوموں کا خون تھا... اُس میں ابھی سفیدی کے ایک قطرے کی بھی آمیزش نہیں تھی... اِس خون کی سرخی آسمان پر ایک عرصہ تک رہے گی... لال آندھی دیر تک چلے گی... ہماری آنکھوں میں‘ ہمارے دلوں میں‘ ہمارے دماغوں کے اندر... کیونکہ کم از کم ہمارے عہد میں تو ایسی خونریزی نہ اس سے پہلے کبھی ہوئی اور نہ اس کے بعد ہوگی... اتنا بوجھ ہم نے اپنے کندھوں پر اِس سے پہلے کبھی نہیں اٹھایا... ڈھائی فٹ کے تابوت کا بوجھ بہت زیادہ ہوتا ہے... یہ احساس بھی شاید پہلی دفعہ ہوا کہ تابوت چھوٹا ہو تو زیادہ وزنی ہوتا ہے... اور پھر اتنے سارے چھوٹے چھوٹے تابوت... دھچکا اتنا بڑا کہ دماغوں تک پہنچا... بے حس جسموں سے اوپر اِس دھچکے نے بند دماغوں کو کھول دیا... اس لیے آواز ایک اٹھی... بس! اب اور نہیں... اس سرخ کھیل کو ختم ہونا چاہیے... آواز کے ایک ہونے سے ایک دم حوصلہ پیدا ہوگیا... سوچ ایک ہونے سے امید نظر آنے لگی... مگر...

کچھ لوگ بٹیر لڑاتے ہیں‘ مجھے آج تک اس بات کی سمجھ نہیں آئی کہ اس ''بٹیر دنگل‘‘ سے ان کو کیا تسکین پہنچتی ہے... میں نے اپنی آنکھوں سے اس دنگل کو دیکھا ہے کہ پہلوان لہو لہان ہو گئے... کئی دفعہ تو کسی پہلوان کے پَر تک جھڑ گئے اور وہ بے چارہ ایک ہی دنگل میں ''بے پَر کا‘‘ ہو گیا... بٹیروں کے اس دنگل میں پہلوانوں کے چہروں کے تاثرات تو شاید ایک جیسے ہی رہتے ہیں لیکن اس دنگل کے دوران منتظمین کی خوفناک شکلیں بن رہی ہوتی ہیں... جیسے اس ''بٹیر دنگل‘‘ میں سارا زور انہی کا لگ رہا ہو... نہ جانے کیا مزہ آتا ہے ان لوگوں کو بٹیر لڑا کر... یہ اپنے اندر موجود اپنی فطری حسِ مخاصمت کی تسکین کے لیے ان بے زبانوں کو لڑاتے ہیں...

میرے خیال میں اگر بٹیر کو تھوڑی بہت عقل ہو اور وہ بولنے کے قابل بھی ہو تو لازماً ان لوگوں کو بُرا بھلا کہے‘ بددعائیں دے جو اسے کسی سے لڑاتے ہیں... یا شاید پھر یہ بٹیرے ان کے کہنے پر اس لیے لڑتے ہیں کہ یہ انہیں باجرہ کھلاتے ہیں... مگر باجرہ تو بھلے مانس بٹیرے کو بھی مل جاتا ہے... ہاں البتہ ان لڑاکے بٹیروں کو بادام‘ گری اور پستے بھی کھلائے جاتے ہیں...اسی لیے یہ بٹیرے اپنے مالک کے اندر موجود فطری حسِ مخاصمت کو تسکین پہنچاتے ہیں...

سیاست کی دنیا میں بھی بٹیر لڑانے والے موجود ہیں جو سیاسی بٹیروں کو آپس میں لڑا رہے ہیں... یہ لوگ بھی عادت سے مجبور ہیں... انہیں بھی انجانی سی تسکین پہنچتی ہے ان بٹیروں کو لڑا کر... اس تماشے کے تماشبین بھی بے شمار ہیں جنہیں اور کوئی مصروفیت نہیں... بالکل ویلے... منہ اٹھائے ان سیاسی بٹیروں کا دنگل دیکھ رہے ہوتے ہیں... اور پھر سارا دن اُس دنگل کے بارے میں گفتگو کرتے رہتے ہیں... گلی محلوں کے تھڑوں اور دکانوں میں بیٹھ کر...

ان سیاسی بٹیر لڑانے والوں کو یہ اندازہ نہیں کہ اس دنگل میں بٹیروں کو شاید کوئی نقصان نہیں پہنچتا مگر معاشرہ لہولہان ہو رہا ہے... انتہائی قیمتی خون جس نے قوم کی رگوں میں دوڑ کر اُسے صحت مند بنانا ہے... خاک میں ملتا جا رہا ہے... بے مول بہتا جا رہا ہے... قوم میں ہراسیت اور یاسیت پھیلتی جا رہی ہے...

خدارا لڑانا بند کرو...

اپنے چند ٹکوں کی خاطر...

ملک میں انتشار پھیلانے کا دھندہ ختم کرو...

اپنی تسکین کے لیے عوام کا سکون برباد مت کرو...

اس المناک دھچکے سے جو پھیلی آواز ایک ہوئی ہے اُسے دوبارہ پھٹنے سے بچائو...

حال سے نظریں اٹھا کر مستقبل کی طرف دیکھو...

ملک فرقہ وارانہ فسادات کی طرف نہ چل پڑے...

انتہائی ذمہ داری کا ثبوت دو...

ورنہ اس نازک وقت میں تھوڑی سی لاپروائی بھی لامتناہی نقصان پہنچا سکتی ہے... ہوشیار رہو کہ 134 شہیدوں کے لہو سے...

''ابھی تو آسمان سرخ ہے‘‘...

یوں شہیدوں کا چلو قرض اتاریں مل کر

آئو سفاک درندے سبھی ماریں مل کر