انتظارِدستِ آہن

بتائیے کیا آپ پورا رستہ برسات میں بھیگنے کے بعد گھر آکر اپنی چھتری کھولتے ہیں ؟

کیا آپ شرٹ پہن کر شاور لے لیتے ہیں ؟

کیا آپ انڈا توڑ کر چھلکے فرائنگ پین میں اور انڈا کچرے کی ٹوکری میں ڈالتے ہیں؟

اگر آپ یہ سب کچھ کریں گے تو لوگ آپ کو پاگل کہیں گے لیکن میں حکومت کو کیا کہوں جو کراچی ایئر پورٹ پر حملے کے بعد اب دہشت گردوں سے آہنی ہاتھوں سے نمٹنا چاہتی ہے ۔ جب ڈھائی درجن افراد کو موت اپنے ساتھ لے گئی، جب دہشت گرد ایک بڑا حملہ کر گئے ،تب آہنی ہاتھ سے نمٹنے کا کیا مطلب ؟

کیا کر رہا تھا یہ آہنی ہاتھ؟جب دہشت گرد وں نے 11مئی کو مینڈیٹ پانے والی جماعت کو بارہ مئی کے روز کوئٹہ میں آئی جی پولیس کے قافلے پر خودکش حملہ کرکے آٹھ لاشوں کا تحفہ دیا ۔یہ آہنی ہاتھ کہاں تھا ؟جب اسی کوئٹہ میں طالبات کی بس پر حملہ ہوا اور چند منٹ بعد بولان میڈیکل کمپلیکس لہو رنگ ہوگیا اور چھبیس زندگیوں سے جینے کا حق چھین لیا گیا ۔مردان زرغون کلے میں حملہ ہوا اور چونتیس افراد موت کے گھاٹ اتارے گئے ۔ موجودہ حکومت کے ایک سال اور چند دنوں میں صرف خودکش حملوں میں مرنے والوں کی تعداد چار سو ساٹھ سے اوپر ہے ۔ ان کی گنتی الگ ہے جو نصب شدہ بموں کا نشانہ بنے اور جو گولیوں سے بھون دیے گئے ، جو اغوا کے بعد اپنے گھروں کو کفن میں لپٹے پہنچے اور وہ جو پہنچے ہی نہیں ،ان کی تعداد الگ ہے ۔

ایئرپورٹ کسی ملک کا چہرہ ہوتا ہے ۔ جب بیرون ملک سے لوگ پاکستان میں داخل ہوتے ہیں تو سب سے پہلے اس چہرے کو دیکھتے ہیں ۔ اس کا نظم و ضبط ،استقبال کی گرمجوشی اور اس کا سکون یا اضطراب آنے والے کو چہرے کی خوبصورتی یا بدصورتی کا پتہ دیتا ہے ۔ ملک کا پہلا تاثر بیرون ملک سے آنے والے ایئرپورٹ سے لیا کرتے ہیں ۔ کراچی ایئرپورٹ پر حملہ کرکے ہمارا چہرہ پہلی بار لہولہان نہیں کیا گیا بلکہ 5ستمبر 1986ء کو پین امریکن ورلڈ ایئر ویز کا بوئنگ طیارہ کراچی ایئر پورٹ پر ہائی جیک ہوا ۔ لمبی چوڑی تکلیف دہ تفصیل کے بجائے اتنا جان لیں کہ اس وقت کے آہنی ہاتھ کے سامنے بیس زندگیاں لی گئیں ،ایک سو بیس افراد زخمی ہوئے۔ ہمارا چہرہ اس سے پہلے پشاور میں بھی لہولہان کیا جا چکا ہے ۔ہمیں ہر دور میں ایک آہنی ہاتھ میسر رہا ہے اور ہم ہر دور میں موم کی ناک ثابت ہوئے ہیں ۔

آہنی ہاتھ حقیقتاً کوئی دست آہن نہیں ہوتا بلکہ یہ اس رویے کا نام ہے جو کوئی ظلم برداشت نہیں کر تا۔آہنی ہاتھ کے سامنے تین تین آپشنز نہیں ہوتے ۔مذاکرات ، جنگ یا مذاکرات اور کارروائی ساتھ ساتھ نہیں چلتے ۔

29جون کو جب وزیراعظم نے قومی اسمبلی میں کھڑے ہو کر مذاکرات کا اعلان کیا تو ان کی تقریر کے الفاظ میں یہ ادراک نہیں جھلکا تھا کہ نو دن پہلے آر اے بازار راولپنڈی میں تیرہ جوانوں کا کسی آہنی ہاتھ کے ایک اشارے کا انتظار ہمیشہ ہمیشہ کے لیے ختم ہوگیا ۔کیا کہیں کہ آہنی ہاتھ والی حکومت کا اعلان مذاکرات 29جون کو ہوا اور کراچی میں رینجرز کے تین جوان بھی اسی روز دھماکے میں ہمیشہ کے لیے زندہ ٔجاوید ہوگئے ۔ان کے چوڑے سینے اور توانا کاندھے کسی ایک مرد آہن کی تھپکی کا انتظار کرتے رہے کہ جاؤ کرو پوری وہ قسم جو تم میں لہو بن کر دوڑتی ہے ۔

آہنی ہاتھ سے نمٹا جائے گا ۔

اپنی سا لمیت پر آنچ نہیں آنے دیں گے ۔

پاکستان ایک خود مختار ملک ہے ۔

امن کی خواہش کو کمزوری نہ سمجھا جائے

اور پاکستان تاریخ کے نازک ترین دور سے گزر رہا ہے ۔

یہ اور اس جیسے کچھ اسباق وہ رٹا ہے جو ہمارے حکمران اقتدار ملنے کے بعد سب سے پہلے مارتے ہیں اور پھر اسے دہراتے رہتے ہیں ،لیکن منزل ایسے سبق یاد کرنے سے نہیں ملا کرتی ۔منزل سبق سکھانے سے ملا کرتی ہے ۔ منزل آگے بڑھنے سے ملا کرتی ہے ۔ منزل ہچکچاہٹ اور تین تین آپشنز سے کیسے ملے گی؟ میر کارواں کے لیے رخت سفر کیا ہے ،یہ نسخہ ہمیں عطا ہو چکا ۔ مصلحت افراد کے معاملات میں ہواکرتی ہے ،اقوام کے معاملات میں نہیں ۔

ہار کو ہرانے کارویہ ، کشتیوں کو جلانے کا رویہ ۔ یہ رویہ مجھے آج مسلم لیگ نون کی حکومت میںپاکستان کے لیے نظر نہیں آتا مگر مسلم لیگ نون میں حکومت کے لیے نظر آیاتھا ۔ 30اکتوبر 2011ء کو عمران خان نے لاہور میں ایک ایسا جلسہ کیا کہ چشم فلک دنگ رہ گئی ۔ اس جلسے میں ایسا جاہ و جلال تھا کہ تخت لاہور کی چولیں ہل گئیں۔ عمران خان سیاسی پنڈتوں کی پیش گوئیوں کا مرکزومحور بن گئے ۔ انہوں نے اعلان کردیا کہ نون لیگ کا لاہور لٹنے کو ہے ۔ عمران خان کے جلسے میں نوجوانوں کا ایک سمندر تھا جس کے سامنے سب کچھ بہہ جانے کے آثار مکمل تھے ۔پیپلز پارٹی کی نا اہل حکومت کے سامنے نون لیگ کا انتخابات جیتنا طے تھا مگر درمیان میں عمران خان ایک بہت بلند دیوار کی صورت آکھڑے ہوئے ۔ یہ ان کا خطرہ تھا جس نے نون لیگ کو کھڑا کیا بلکہ دوڑایا ۔ ریکارڈ مدت میں میٹرو بنی ۔ نوجوان نون لیگ کا فوکس ہوگئے اور لیپ ٹاپ اسکیم ٹاپ پر آگئی ۔ ایک کے جواب میں چار چار جلسے کیے گیے ۔ جلسوں میں وہی رنگ نظر آیا جو تحریک انصاف نے سکھایا تھا۔ ایک محاذ میاں نواز شریف نے سنبھالا ۔ ایک جانب شہباز شریف 'میں نہیں مانتا ‘سرا ہوئے اور دو محاذوں پر جنگ لڑنے کو حمزہ شہباز اور مریم نواز کو اتارا گیا ۔ کچھ شہباز شریف کی محنت اور کچھ نگران حکومت کی حکمت ۔ نون لیگ اقتدار میں آگئی ۔ لیکن آج ضرورت ہے کہ کاش کوئی حکمرانوں کو یہ بتادے کہ ان حالات میں خطرہ ایئرپورٹس ، عسکری دفاتر ، اسپتالوں اور عمارتوں کو نہیں،ریاست کو ہے اور یہ بھی بتادے کہ اگر ریاست کو خطرہ ہے تو یہ خطرہ اقتدار کو بھی ہے ۔