چکوال میں نیرنگیٔ سیاست دوراں

ایک چکوال ہی کیا‘ملک بھرمیںنیرنگیٔ سیاست کا جادوسرچڑھ کر بول رہاہے۔2018ء کے عام انتخابات کے لیے بڑی جماعتوں میں ٹکٹوں کی تقسیم پروہ بھونچال آیا ہے کہ شایدہماری تاریخ میں چشم فلک نے نہ دیکھاہوگا۔بے رحم سیاست کے سینے میں دل نہیں ہوتا...محسن بھوپالی کی روح کے ساتھ معذرت کے ساتھ‘اکثرحلقوں میں تو یوں ہواہے کہ:

نیرنگیٔ سیاست دوراں تو دیکھیے

''ٹکٹ‘‘ انہیں ملا جو شریکِ سفر نہ تھے

بلا شبہ ٹکٹ دینے اورلینے والوں نے فیصلہ سازی کے ضمن میں مشکل ترین وقت دیکھاہے۔سیاسی جماعتوں نے جہاںکئی امیدواروں کوگرین سگنل دیتے دیتے‘ٹکٹوں کی الاٹمنٹ میں انہیں جھنڈی کرادی‘ وہاں بہت سے امیدوار‘حتیٰ کہ ٹکٹ ہولڈربھی ‘ جنہوں نے کب سے دائیاں اشارہ لگایاہواتھا‘ عین وقت پربائیں مڑگئے ۔ایک کالم میں اتنی گنجائش نہیں کہ ملک بھرمیں ہونے والی اس اتھل پتھل کاتفصیلی ذکرکیاجاسکے۔صرف جنوبی پنجاب میں آخری روزن لیگ کے 12امیدواروں نے ٹکٹ واپس کیے۔یہاں چکوال میں بھی سردارذوالفقاردلہہ نے آخری روز PP-23سے ن لیگ کا ٹکٹ واپس کرکے NA-64کے لیے پی ٹی آئی کی طرف سے جاری شدہ ٹکٹ عدالت میں جمع کرایا‘ تو لوگوں پرجیسے حیرتوں کے پہاڑٹوٹ پڑے‘ مگر سیاست کو ممکنات کا کھیل قراردیاجاتاہے اوراس میں کسی بھی وقت کچھ بھی ہوسکتاہے۔سردارذوالفقاردلہہ ان امیدواروں میں سے ہیں‘ جوانتخابات میں کھلے دل سے خرچ کرتے ہیں۔ وہ 2013ء کے عام انتخابات میںن لیگ کے ٹکٹ پریہاں سے ممبرصوبائی اسمبلی منتخب ہوئے تھے ۔اس مرتبہ انہوں نے اس صوبائی حلقے کے علاوہ NA-64سے بھی اپنے کاغذات نامزدگی داخل کرائے تھے اور اس قومی حلقے کے لیے ٹکٹ کے خواہاں تھے۔ن لیگ کی طرف سے انہیں سابقہ صوبائی حلقے ہی سے ٹکٹ مل سکا‘مگرنیرنگیٔ سیاست دوراں دیکھیے کہ اب وہ قومی اسمبلی کے حلقہ NA-64 سے پی ٹی آئی کے امیدوارہیں۔

NA-64سے سردارغلام عباس پی ٹی آئی کے امیدوارتھے اوروہ سب سے فیورٹ قراربھی دیے جارہے تھے۔حادثہ ان کے ساتھ یہ ہواکہ اپیلنٹ ٹریبونل کے جج جسٹس عبادالرحمان لودھی‘ جنہوں نے شاہدخاقان عباسی کو NA-57مری سے انتخاب لڑنے کے لیے نااہل قراردیا‘ اسی روزاس عدالت نے سردارعباس اوران کے بھتیجے سردارآفتاب اکبرکو بھی NA-64چکوال سے نااہل کردیا۔27جون کے دن یہ غیرمتوقع فیصلہ چکوال کی سیاست میں خاصابھونچال لایا۔ ایپلیٹ ٹریبونل کے ان فیصلوں کو امیدواروں نے چیلنج کیا۔ہائی کورٹ کے دورکنی بنچ نے شاہدخاقان عباسی کی نااہلی کا فیصلہ معطل کرتے ہوئے الیکشن کمیشن سمیت دیگر فریقین کونوٹس جاری کردیے۔سردارعباس اورآفتاب اکبر کو بھی الیکشن لڑنے کی اجازت دیتے ہوئے دورکنی بنچ نے آئندہ سماعت کے لیے آج کی تاریخ مقررکی۔اس موقع پر ذوالفقاردلہہ پی ٹی آئی کا ٹکٹ لینے پہنچ گئے اورپارٹی قیادت نے عدالت کے فیصلے کاانتظارکیے بغیر انہیں ٹکٹ جاری کردیا۔پارٹی کی طرف سے عذریہ پیش کیاگیاہے کہ ٹکٹ جاری کرنے کے آخری دن پی ٹی آئی کے پاس کوئی اورآپشن نہیں رہاتھا‘کیونکہ سردارعباس اوران کے کورنگ امیدوارآفتاب اکبرکی اپیل منظورنہ ہوئی توان کی یہ سیٹ خالی رہ جائے گی۔

عدالت اوربعدازاں پی ٹی آئی کے اس فیصلوں سے چکوال کاسیاسی منظرنامہ یکسرتبدیل ہوگیا۔سردارعباس کے حامیوں میں مایوسی پھیل گئی اورانہوں نے سردارذوالفقارکو ٹکٹ ملنے پر پرزوراحتجاج کیا‘تاہم PP-23کے لیے سردارعباس اورآفتاب اکبرکے کاغذات نامزدگی منظورہوچکے ہیںاورآفتاب اکبر کو پی ٹی آئی کا ٹکٹ بھی مل چکاہے۔اس موقع پرسردارعباس نے دانشمندانہ فیصلہ کیا۔انہوں نے پی ٹی آئی کے امیدواروںPP-21پرراجہ یاسرسرفراز‘PP-22پرراجہ طارق افضل کالس اورPP-23پرسردارآفتاب اکبرکی حمایت کااعلان کیااوریوںضلع میں اپنی اور پی ٹی آئی کی سیاست کو کسی توڑپھوڑسے بچالیا۔خود انہیں آزاد امیدوارکی حیثیت سے نشان الاٹ ہوچکاہے اورانہوں نے عدالت عالیہ کے فیصلے کے بعداپنا لائحہ عمل طے کرنے کاعندیہ دیاہے۔اب تک کی اس حکمت عملی کا انہیں ایک فائدہ یہ ہواہے کہ ان کے بھتیجے سردارآفتاب اکبر کی پوزیشن خاصی مضبوط ہوگئی ہے‘ کیونکہPP-23سے ذوالفقاردلہہ کے ٹکٹ واپس کرنے کے بعدن لیگ کومجبوراًایک کمزورامیدوارکو ٹکٹ دیناپڑاہے۔

ان صفحات پرپہلے بھی عرض کیا جاچکا ہے کہ چکوال میں دوطاقتیں ووٹ بینک رکھتی ہیں‘ ایک مسلم لیگ(ن) اوردوسری سردارعباس۔سردارعباس پرہم پارٹیاںبدلنے کے حوالے سے تنقیدکرسکتے ہیں‘ مگران کی عوامی مقبولیت کو نظراندازکرنازمینی حقائق سے آنکھیں چرانے کے مترادف ہوگا۔براہ راست عوامی رابطہ اورترقیاتی کا موں کا کریڈٹ انہیں دوسروں سے ممتازکرتاہے اوراسی بناپر وہ قابل لحاذذاتی ووٹ بنک رکھتے ہیں۔ان کے ضلع ناظمی کے دورمیں اس پسماندہ ضلع میں بننے والے گیارہ ڈیمز‘پانچ گرلزکالج‘ انجینئرنگ یونیورسٹی ٹیکسلاکا چکوال کیمپس‘ پولی ٹیکنیکل کالج‘ تین سیمنٹ فیکٹریاں‘ درجنوں بجلی کے منصوبے اورسڑکوںکاجال ان کا وہ کریڈٹ ہے ‘جس کی بنا پر وہ اپنے سیاسی حریفوں پربرتری رکھتے ہیں۔ 2013ء کے عام انتخابات میں وہ اس حلقے سے آزادحیثیت میں الیکشن لڑکرایک لاکھ سات ہزارووٹ حاصل کرچکے ہیں۔2008ء میںNA-60پران کے بھائی سردارنواب خان بحیثیت آزادامیدوار اورNA-61پران کے حمایت یافتہ چوہدری پرویزالٰہی دونوں ہارگئے‘ مگرنوے‘نوے ہزارسے زائدووٹ حاصل کیے۔(اس مرتبہ بھی چوہدری پرویزالٰہی اس حلقے سے‘ جو اب NA-65ہے‘پرپی ٹی آئی اوران کی حمایت سے ن لیگ کے امیدوارسردارفیض ٹمن کے خلاف انتخاب لڑرہے ہیں) سردارعباس دومرتبہ بھاری اکثریت سے ضلع ناظم منتخب ہوئے۔1985ء کے بعدچکوال کا ووٹ پیپلزپارٹی کے لیے اجنبی رہاہے ‘مگرجب وہ1992ء میں پی پی میں تھے توانہوں نے اپنی عوامی مقبولیت کے بل بوتے پراپنی صوبائی اورسردارممتازٹمن کی قومی اسمبلی کی سیٹ(NA-61)پرکامیابی حاصل کی‘ جس پرخودبے نظیربھٹوبھی حیران ہوئیں۔اس دورمیں وہ صوبائی وزیربھی رہے(اس کے بعدیہاں پی پی کی دوبارہ وہی اجبنیوں والی صورتحال ہے)2015ء کے بلدیاتی انتخابات میں بھی سردارعباس کے گروپ نے آزادحیثیت میں کامیابی حاصل کی ‘ جب ن لیگ کااقتدارعروج پرتھا۔

اگرچہ 2018ء کے انتخابات کے لیے تجزیوں سے پتاچلتاہے کہ پنجاب میں ن لیگ کو اب بھی ہراناآسان نہیں‘ تاہم جن اضلاع میں وہ کمزورہوئی ہے‘ ان میں چکوال بھی شامل ہے۔سردارعباس کی پی ٹی آئی میں شمولیت کے بعدبجاطورپرسمجھاجارہاتھاکہ ن لیگ کے اس قلعے میں دراڑڈالناممکن ہوگیاہے ‘مگران کی نااہلی اورٹکٹ کی تبدیلی سے حالات پھر سے بدل گئے ہیں۔عدالت کی طرف سے سردارعباس کو اہل قراردینے کے بعداگروہ'' پی ٹی آئی آزاد نظریاتی گروپ ‘‘کی طرف سے الیکشن لڑتے ہیں‘توپی ٹی آئی کا ووٹ بینک متاثرہوگااورن لیگ کے میجر(ر)طاہراقبال کو اس کا فائدہ پہنچ سکتاہے۔اس حلقے سے دونوں ونگز(امیدواران صوبائی اسمبلی)کی انڈرسٹینڈنگ سردارعباس کے ساتھ ہے اوریہ لوگ مل کرخاصاہوم ورک بھی کرچکے تھے۔ اب تک دونوں ونگزکی ہمدردیاں انہی کے ساتھ ہیں۔پی ٹی آئی کے دیرینہ مقامی اورٹکٹ سے محروم رہنے والے رہنما چوہدری علی ناصر بھٹی بھی سردارعباس کے ساتھ ہیں۔ اگر یہ ہمدردیاں بررقراررہیںاورسردارعباس نے آزار امیدوار کی حیثیت سے الیکشن لڑاتومقابلہ ن لیگ کے میجرطاہراوران کے درمیان بھی ہوسکتاہے ۔دوسری صورت میںاگرچہ قومی اسمبلی کے اس حلقے میںپی ٹی آئی کے نئے امیدوارکی پوزیشن کمزورہے ‘تاہم اگر سردارعباس انتخاب نہ لڑکے اس حلقے سے ذوالفقاردلہہ کی حمایت کرتے ہیں‘تون لیگ کوپچھاڑاجاسکتاہے۔آنے والے چنددنوں میں پتاچلے گا کہ نیرنگیٔ سیاست دوراں ابھی اورکیاکیارنگ دکھاتی ہے۔

روزنامہ دنیا ایپ انسٹال کریں