تجارتی خسارے میں 18 فیصد اضافہ،2.30ارب ڈالرریکارڈ
کراچی(بزنس رپورٹر)تجارتی خسارہ مسلسل بڑھنے لگا جس کے باعث کاروباری حلقوں میں تشویش کی لہر دوڑ گئی ۔ مالیاتی اداروں کے مطابق تجارتی خسارہ جنوری 2024 سے جنوری 2025 تک یعنی ایک سال کے عرصے میں 18 فیصد اضافے سے 2 ارب 30کروڑ ڈالر تک پہنچ گیا۔
جنوری 2025 میں برآمدات کا حجم 3 ارب ڈالر ریکارڈ کیا گیا جو سالانہ 6 فیصد اضافے اور ماہانہ1 فیصد ترقی کو ظاہر کرتا ہے مگر گزشتہ سال جنوری 2024 سے لے کر جنوری 2025 تک درآمدات 5 ارب 30 کروڑ ڈالر رہیں جو سالانہ بنیادوں پر 11 فیصد زیادہ ہیں۔ دوسری جانب دسمبر 2024 کے مقابلے میں جنوری 2025 میں درآمدات میں 2 فیصد کی معمولی کمی دیکھنے میں آئی ہے ۔ رپورٹ کے مطابق رواں مالی سال کے ابتدائی7مہینوں کے دوران تجارتی خسارہ 2.9 فیصد اضافے کے ساتھ 13 ارب 50 کروڑ ڈالر تک پہنچ گیا ہے ۔
روزنامہ دنیا ایپ انسٹال کریں
