سونے کی قیمتیں تاریخ کی بلند ترین سطح پر،ڈالر مہنگا
کراچی(بزنس رپورٹر)زرمبادلہ کی دونوں مارکیٹوں میں ڈالر کے مقابلے روپے کی قدر گرگئی، ادھرسونے کی قیمتوں میں اضافے کا سلسلہ رک نہ سکا ۔
جس کے نتیجے میں سونے کی قیمتیں تاریخ کی بلند ترین سطح پر پہنچ گئیں ۔اسٹیٹ بینک کے مطابق انٹربینک میں ڈالر 16 پیسے کے اضافے سے 280.22 روپے پر جاپہنچا۔ اوپن مارکیٹ میں ڈالر 24 پیسے مہنگا ہوکر 281.86 روپے کاہوگیا۔دوسری جانب عالمی بلین مارکیٹ میں سونا 46 ڈالر کے بڑے اضافے سے 2988 ڈالر فی اونس کا ہوگیا۔بین الاقوامی مارکیٹ میں سونے کے نرخ میں اضافے کے باعث مقامی سطح پر بھی فی تولہ سونا 4 ہزار 700 روپے کے نمایاں اضافے سے ملکی تاریخ میں پہلی بار 3 لاکھ 14 ہزار کی بلند ترین سطح پر جاپہنچا۔اسی طرح دس گرام سونے کی قیمت 4 ہزار 30 روپے کے بڑے اضافے سے 2 لاکھ 69 ہزار 204 روپے ہوگئی۔یاد رہے کہ جمعرات کو سونے کی فی تولہ قیمت 2800 روپے کے بڑے اضافے سے 3 لاکھ 9 ہزار 300 روپے پر جاپہنچی تھی۔ چاندی فی تولہ قیمت 90 روپے کے اضافے سے 3 ہزار 530 روپے ہوگئی۔
