بھارت سے درآمدات سال میں چوتھی بار بڑھ گئیں
اسلام آباد (این این آئی)موجودہ حکومت کے ایک سال کے دوران بھارت سے سالانہ بنیادوں پر درآمدات میں چوتھی بار اضافہ ریکارڈ کیا گیا۔
وزارت تجارت ذرائع کے مطابق تجارت معطل ہونے کے باوجود بھارت سے درآمدات ایک بار پھر بڑھ گئیں، فروری 2025 کے دوران بھارت سے سالانہ بنیادوں پر درآمدات میں 28 فیصد اضافہ ریکارڈ کیا گیا۔ذرائع کے مطابق فروری 2025 کے دوران بھارت سے درآمدات کا حجم 2کروڑ 68 لاکھ ڈالرز رہا۔گزشتہ سال اسی مدت میں بھارت سے درآمدات 2کروڑ 8لاکھ ڈالرز رہی تھیں۔یاد رہے کہ رواں مالی سال اگست اور ستمبر میں بھارت سے سالانہ بنیادوں پر درآمدات میں اضافہ ہوا تھا۔حکام کے مطابق پاکستان نے اگست 2019 میں بھارت کے ساتھ تجارت معطل کردی تھی، بعدازاں پاکستان نے بھارت کے ساتھ تجارت میں نرمی کی تھی۔حکومتی ذرائع کے مطابق پاکستان نے بھارت کے ساتھ زندگی بچانے والی ادویات کی تجارت کرنے کی اجازت دی تھی۔
