زرعی شعبے میں جدید ٹیکنالوجی اپنانا ناگزیر،میاں کاشف
لاہور(اے پی پی)چیف ایگزیکٹو آفیسر پاکستان فرنیچر کونسل میاں کاشف اشفاق نے کہا ہے کہ پائیدار معاشی نمو، غربت میں کمی اور تیز رفتار ترقی کیلئے زرعی شعبے میں جدید ٹیکنالوجی کو اپنانا انتہائی ضروری ہے ۔
اتوار کو بورڈ آف ڈاریکٹرز کی میٹنگ سے خطاب کرتے ہوئے انہوں نے کہا کہ زراعت ہماری معیشت کی ریڑھ کی ہڈی ہے جو جی ڈی پی، روزگار اور غذائی تحفظ میں اہم کردار ادا کرتی ہے تاہم ناکافی انفرااسٹرکچر و سرمایہ کاری اور جدت پذیری کی کمی کی وجہ سے یہ شعبہ پسماندگی کا شکار ہے ۔ انہوں نے ایسی پالیسیوں کے نفاذ پر زور دیا جو زراعت میں تکنیکی ترقی، آبپاشی کے بہتر انتظام اور اعلی معیار کے بیجوں و کھادوں کی فراہمی میں معاون ہوں۔ میاں کاشف اشفاق نے کہا کہ چھوٹے کسانوں کیلئے مالی اعانت میں اضافہ کیا جائے تاکہ پیداواری لاگت اور موسمیاتی تبدیلی کے اثرات پر قابو پانے میں مدد مل سکے ۔ برآمدات کو بڑھانے اور زیادہ محصولات کیلئے زرعی مصنوعات کی مارکیٹ تک رسائی کو بہتر اور قیمت کو مسابقتی بنایا جائے ۔انہوں نے کہا کہ حکومتی سطح پر بہتر پالیسی سازی اور نجی شعبے و بین الاقوامی تنظیموں کے مابین باہمی تعاون سے جدت طرازی کو ممکن اور پیداواری صلاحیت کو بڑھا سکتا ہے ۔ میاں کاشف نے کسانوں کو جدید مہارتوں سے آراستہ کرنے کیلئے تعلیمی و تربیتی پروگراموں کے کردار پر بھی زور دیا اور کہا کہ اس شعبے میں سرمایہ کاری کرکے ہی پاکستان غذائی تحفظ، غربت میں کمی اور پائیدار ترقی کی راہ ہموار کرسکتا ہے۔
