پاک،جمہوریہ کوریامختلف شعبوں میں تعاون بڑھا سکتے ،سفیر
پشاور(اے پی پی)پاکستان میں تعینات جمہوریہ کوریاکے سفیرپارک کی جون نے پشاورچیمبرآف اسمال ٹریڈرزکادورہ کیااور دو طرفہ معاشی و تجارتی امور پر تبادلہ خیال کیا۔
گروپ لیڈرملک مہرالہی، صدرشکیل احمدخان صراف، سینئر نائب صدرحاجی طلا محمد،سابق صدرملک سلمان الٰہی نے چیمبرآمدپران کاپرتپاک استقبال کیا۔ ایگزیکٹو ممبرز اور پشاورکی تاجربرادری کی کثیر تعداد موجود تھی، ملک مہرالہی اورشکیل احمدصراف نے کہاکہ کوریا کے چیمبرز کے درمیان روابط کو مضبوط بنانا ناگزیر ہے ۔تجارت سے متعلق معلومات کا اشتراک اور ریسرچ کرکے ہم ایک دوسرے کی مارکیٹوں کو بہتر طور پر سمجھ سکتے ہیں اور باہمی دلچسپی کے شعبوں کی نشاندہی کر سکتے ہیں،دونوں ممالک مل کر ترقی اور خوشحالی کے لئے مختلف شعبوں میں دوطرفہ تعاون کو بڑھا سکتے ہیں۔اس موقع پرکورین سفیرکوویزے کے حصول میں حائل مشکلات سے آگاہ کیاگیا،پارک کی جون نے تاجر برادری کو یقین دہانی کرائی کہ پاکستان اور کوریا کے درمیان تجارتی ویزہ کے اجرا میں حائل رکاوٹوں کو دور کرنے میں اپنا کردار ادا کریں گے تاکہ دونوں ملکوں کے درمیان تجارتی و معاشی تعلقات کو مزید استوار کیا جاسکے۔
