سینیٹ کمیٹی کا ای پی زیڈ اے کا دورہ، آپریشنل چیلنجز کا جائزہ
کراچی(اسٹاف رپورٹر)سینیٹ کی قائمہ کمیٹی برائے صنعت و پیداوار کے چیئرمین سینیٹر عون عباس کی قیادت میں ایک وفد نے ۔۔
ایکسپورٹ پروسیسنگ زونز اتھارٹی (ای پی زیڈ اے )نے ہیڈکوارٹر کا دورہ کیا۔ کمیٹی نے ادارے کو درپیش موجودہ مسائل کا جائزہ لیا اور صنعتی پیداواری صلاحیت میں اضافے اور سرمایہ کاروں کی سہولت کاری کیلئے اقدامات پر تبادلہ خیال کیا۔وفد میں سینیٹر سید مسرور احسن، سینیٹر دنیش کمار، سینیٹر سلیم مانڈوی والا، سینیٹر خالدہ عتیب اور سینیٹر حسنا بانو شامل تھیں۔کمیٹی نے ای پی زیڈ اے کے حکام کے ساتھ تفصیلی گفتگو کی جس میں ادارے کو درپیش اہم آپریشنل اور قانونی مسائل زیر بحث آئے ۔بریفنگ کے دوران ای پی زیڈ اے کے چیئرمین اے ڈی خواجہ نے بتایا کہ ٹیکس پالیسیوں میں عدم تسلسل سے برآمدی زونز میں کام کرنے والے کاروباری اداروں کیلئے مالیاتی غیر یقینی صورتحال پیدا ہو رہی ہے ۔ حکام نے کہا کہ ان حل طلب ٹیکس مسائل کے باعث سرمایہ کاروں میں الجھن پائی جاتی ہے ، جو ان مراعات کو متاثر کر رہی ہے جو ایکسپورٹ پروسیسنگ زونز کے قیام کے وقت فراہم کی گئی تھیں۔قائمہ کمیٹی نے اس بات کو تسلیم کیا کہ ٹیکسیشن میں غیر یقینی صورتحال غیر ملکی اور مقامی سرمایہ کاری کے لیے ایک بڑی رکاوٹ ہے ۔ کمیٹی نے فوری طور پر ای پی زیڈ اے ،ایف بی آر اور وزارت خزانہ کے مابین روابط مضبوط کرنے پر زور دیا تاکہ ٹیکس ڈھانچے کو بہتر بنایا جا سکے اور برآمدی زونز میں سرمایہ کاروں کے لیے پالیسی میں استحکام پیدا کیا جا سکے ۔
