کمشنر فیصل آباد کی زیرصدارت اہم اجلاس کا انعقاد
فیصل آباد(خصوصی رپورٹر)کمشنر فیصل آبادسلوت سعید کی زیرصدارت اہم اجلاس منعقد ہواجس میں ڈپٹی کمشنر کیپٹن (ر)ندیم ناصر بھی موجودتھے ۔
کمشنر فیصل آباد نے طالب علموں کی جدید خطوط پر کردار سازی اور انہیں صحت مندانہ سرگرمیوں میں شریک کرنے کیلئے اقدامات کی ضرورت پر زوردیا۔انہوں نے ایجوکیشن اتھارٹی کو مختلف کھیلوں اورتقریری مقابلے کرانے کی ہدایت کی اور کہا کہ سکولز میگزین کو فروغ دیں اور بک کلبز کو پروان چڑھائیں جبکہ قرآت ونعت خوانی کے مقابلے تسلسل سے ترتیب دیکر عملدرآمد کرایا جائے ۔انہوں نے کہا کہ کمیونٹی کے سینئر افراد کے ذریعہ طلباء کی رہنمائی کے پروگرامز ترتیب دیں۔کمشنر نے کہا کہ نجی ہائوسنگ سوسائٹیز کے زیرانتظام کمیونٹی سنٹرز اور آرٹس کونسل کے اشتراک سے کلچر کی بحالی اور ادبی سرگرمیوں کیلئے میگا ایونٹس کرائے جائیں۔انہوں نے کہا کہ طالب علموں اور نوجوان نسل کو منفی سرگرمیوں سے دور رکھنے اور صحت مندانہ سرگرمیوں کی جانب راغب کرنا وقت کی اشد ضرورت ہے ،اس ضمن میں ایجوکیشن ڈیپارٹمنٹ، ایف ڈی اے ، آرٹس کونسل ودیگر معاون ادارے ذمہ داریوں کا ادراک کریں۔
