ڈی پی او چنیوٹ کی جامعہ مسجد فاروق اعظم میں کھلی کچہری
چنیوٹ(ڈسٹرکٹ رپورٹر )وزیراعلیٰ پنجاب مریم نواز کے ویژن کے مطابق کمیونٹی پولیسنگ کے فروغ کیلئے اقدامات جاری ہیں،ڈسٹرکٹ پولیس آفیسرچنیوٹ عبداﷲاحمد نے جمعتہ المبارک کے موقع پر جامعہ مسجد فاروق اعظم،عالمگیر روڈ،چنیوٹ میں کھلی کچہری لگائی۔
اس موقع پر ایس ایچ او تھانہ سٹی ،انچارج شکایت سیل اوردیگر پولیس افسروں اور نمازیوں کی کثیر تعداد موجود تھی۔ڈی پی او عبداﷲ احمد نے شہریوں کے مسائل سنے اور حل کی یقین دہانی کروائی۔ڈی پی او نے متعلقہ افسران کو دادرسی یقینی بنانے کی ہدایت کرتے ہوئے کمپلینٹ سیل کو فالواپ رپورٹ پیش کرنے کی بھی ہدایت کی ۔ڈی پی او نے پنجاب پولیس کی مختلف سروسز سے متعلق شرکاء کو بریفنگ دی۔ عبداللہ احمد نے شرکاء سے خطاب کرتے ہوئے کہا کہ مسجد میں کھلی کچہری لگانا حضرت محمد ؐکی سنت ہے تاکہ آپ کے مسائل آپ کے پاس آکر سن کر حل کئے جائیں اور کمیونٹی پولیسنگ کو فروغ دیا جائے ۔شہری معاشرتی،اخلاقی برائیوں و جرائم پیشہ عناصر سے متعلق اطلاع دے سکتے ہیں۔شہریوں کی دادرسی یقینی بنائی جائے گی۔ڈی پی او نے گفتگوکرتے ہوئے کہا کہ لوگوں کی جان و مال کی حفاظت،امن و امان کا قیام اولین ترجیح ہے ۔تمام وسائل بروئے کار لاتے ہوئے پبلک سروس ڈلیوری میں بہتری کیلئے اقدامات جاری ہیں۔ دوسری طرف سرکل ڈی ایس پیز ،ایس ایچ اوزنے بھی اپنے اپنے علاقوں میں نماز جمعہ کے موقع پر کھلی کچہریاں لگائیں اورلوگوں کے مسائل سنے ۔
