جانوروں میں لمپی سکن ڈزیز کی روک تھام کیلئے ڈویژن میں 23 چیک پوسٹیں قائم
فیصل آباد(خصوصی رپورٹر)سیکرٹری لائیو سٹاک پنجاب ثاقب علی عطیل کی ہدایات کے مطابق ڈویژن بھر کے تمام داخلی اور خارجی راستوں پر لمپی سکن ڈزیز کی روک تھام کے لئے چیک پوسٹیں قائم کر دی گئی ہیں۔۔۔
تاکہ کوئی بھی متاثرہ جانور داخل نہ ہو سکے ۔ ڈویژن میں 23 جن میں سے جھنگ میں 8، فیصل آباد میں 7جبکہ چنیوٹ اور ٹوبہ ٹیک سنگھ میں 4،4 چیک پوسٹیں قائم کی گئی ہیں۔ پوسٹوں پر محکمہ لائیو سٹاک کا عملہ24 گھنٹے ڈبل شفٹ میں تعینات کر دیا گیا ہے اور دوسرے اضلاع سے آنے والے جانوروں کو چیچڑ/مکھی مار سپرے کیا جا رہا ہے ۔اس حوالے سے ڈائریکٹر لائیو سٹاک ڈاکٹر سید ندیم بدر نے ڈویژن میں قائم کی گئی مختلف چیک پوسٹوں کا دورہ کیا اور وہاں تعینات ویٹرنری عملے کی حاضری چیک کی اس کے علاوہ وہاں پر موجود ادویات کا جائزہ لیا اور عملے کو ہدایات جاری کیں کہ وہ اپنی ڈیوٹی احسن طریقے سے سر انجام دیں۔ مزید برآں انہوں نے ٹرک مالکان سے بھی گزارشات کیں کہ وہ جہاں پہ محکمہ لائیو سٹاک کی جانب سے چیک پوسٹیں بنائی گئی ہیں وہاں پر اپنی گاڑی کو لازمی طور پر روکیں اور وہاں پر موجود سٹاف سے اپنے جانوروں کو چچڑ/مکھی مار سپرے لازمی کروائیں۔سیکرٹری لائیو سٹاک کا کہنا ہے کہ محکمہ نے لمپی سکن ڈزیز کی پہلی لوکل ویکسین تیار کر لی اور الرٹ بھی جاری کر دیاگیا ہے ۔مویشی پال حضرات کو مشورہ دیا جاتا ہے کہ وہ اپنے باڑوں میں حفظان صحت کو برقرار رکھیں، علامات کی نگرانی کریں۔
