ڈی پی او چنیوٹ کی محلہ کرم آباد کی مسجد میں کھلی کچہری
چنیوٹ(ڈسٹرکٹ رپوٹر )چنیوٹ میں بھی کمیونٹی پولیسنگ کے فروغ کیلئے اقدامات جاری ہیں،ڈسٹرکٹ پولیس آفیسر عبداﷲاحمد نے جمعۃ المبارک کے موقع پر جامعہ مسجد مدنی محلہ کرم آباد چنیوٹ میں کھلی کچہری لگائی جس میں پولیس افسران،انچارج کمپلینٹ سیل اور نمازیوں کی کثیر تعداد موجود تھی۔
اس موقع پر ڈی پی او عبداﷲ احمد نے شہریوں کے مسائل سنے اور ان کے حل کی یقین دہانی کروائی۔ڈی پی او نے متعلقہ افسران کو دادرسی یقینی بنانے ،کمپلینٹ سیل کو درخواستوں کی فالو اپ رپورٹ پیش کرنے کی بھی ہدایت کی ۔ڈی پی او نے شرکاء سے خطاب کرتے ہوئے کہا کہ مسجد میں کھلی کچہری لگانا حضرت محمدؐ کی سنت ہے تاکہ آپ کے مسائل آپ کے پاس آکر سن کر حل کئے جائیں اور کمیونٹی پولیسنگ کو فروغ دیا جائے۔ لوگوں کے جان و مال کی حفاظت،امن و امان کا قیام اولین ترجیح ہے ۔ دوسری طرف چنیوٹ میں تمام سرکل ڈی ایس پیز ،ایس ایچ اوزنے بھی اپنے اپنے علاقوں میں نماز جمعہ کے موقع پر کھلی کچہریاں لگائیں اورلوگوں کے مسائل سنے ۔ادھر ایم پی اے مولانا محمد الیاس چنیوٹی نے مساجد میں کھلی کچہریوں کے اقدام کو سراہا ہے۔
