صفائی میں غفلت ہرگز برداشت نہیں کی جائیگی:ڈپٹی کمشنر
فیصل آباد (خصوصی رپورٹر)ستھرا پنجاب مہم کے ثمرات براہِ راست عوام تک پہنچانے کیلئے صفائی ستھرائی پر زیرو ٹالرنس پالیسی اپنائی گئی ہے جس پر کسی قسم کا سمجھوتہ نہیں کیا جائے گا۔
یہ بات ڈپٹی کمشنرکیپٹن (ر)ندیم ناصر نے ستھرا پنجاب مہم کے سلسلے میں اجلاس کی صدارت کرتے ہوئے کہی۔ڈپٹی کمشنر نے کہا کہ صفائی معاملات میں غفلت یا لاپرواہی ہرگز برداشت نہیں کی جائے گی۔ تمام کنٹریکٹرز کو خبردار کیا جاتا ہے کہ وہ فوری طور پر اپنی کارکردگی بہتر بنائیں بصورت دیگر انکے معاہدے منسوخ کر دیئے جائیں گے ۔ مانیٹرنگ کے دوران صفائی میں معمولی سی کوتاہی پر بھی بھاری جرمانے عائد کئے جائیں گے جبکہ غیر ذمہ دار اہلکاروں کو نوکری سے فارغ کر دیا جائے گا۔انہوں نے ہدایت کی کہ دیہی علاقوں میں صفائی کے معیار کو مزید بہتر بنایا جائے اور کچڑے کے ڈھیروں کو ایک ہفتے کے اندر اندر مکمل طور پر صاف کیا جائے ۔ ڈپٹی کمشنر نے اسسٹنٹ کمشنرز کو ہدایت کی کہ وہ اپنی متعلقہ تحصیلوں کی15 یونین کونسلز کا خود دورہ کریں اور صفائی کے حوالے سے رپورٹ پیش کریں۔ صفائی کے زمینی اثرات ہر صورت میں نمایاں ہونے چاہئیں۔ ہریوسی سطح پر پٹواری، سیکرٹری یونین کونسل،امام مسجد اور نمبردار پر مشتمل فعال کمیٹی تشکیل دی جائے جو صفائی کی نگرانی کرے ۔ رورل ایریاز میں عوامی آگاہی کیلئے پمفلٹس کی تقسیم اور مساجد و دیگر ذرائع سے اعلانات کرائے جائیں تاکہ صفائی کے مؤثر اور مربوط پلان پر عملدرآمد یقینی بنایا جا سکے ۔
