کشمیری اپنی امنگوں کے مطابق فیصلہ کرینگے ،ڈاکٹر ذوالفقار
فیصل آباد(سٹاف رپورٹر)زرعی یونیورسٹی فیصل آباد کے وائس چانسلر پروفیسر ڈاکٹر ذوالفقار نے کہا ہے کہ کشمیری بہن بھائیوں کو جس جبرواستبدار اور بربریت کا سامنا ہے اس کے خلاف پوری پاکستانی قوم سیسہ پلائی دیوار کی طرح کھڑی ہے۔
ان باتوں کا اظہار انہوں نے یوم استحصال کشمیر پریونیورسٹی کے آفس آف سینئر ٹیوٹر کے زیراہتمام یکجہتی تقریب سے بطور مہمان خصوصی اپنے خطاب کے دوران کیا۔ انہوں نے کہابھارت نے 5۔اگست 2019ء کو جموں کشمیر کی خصوصی حیثیت ختم کر کے مقبوضہ کشمیر کو براہ راست کنٹرول میں لے لیا ہے عالمی برادری بھارت پر دباؤ ڈالے تاکہ وہ کشمیریوں پر ہونے والے ظلم و ستم کا سلسلہ ختم کر تے ہوئے جینے کا حق فراہم کیا جائے ۔ انہوں نے اس عزم کا اعادہ کیا کہ بھارتی استحصال کے خاتمے تک پوری قوم اپنے محصور کشمیری بہن بھائیوں کے ساتھ کھڑی ہے ۔ اس دن کے حوالے سے ریلی کا انعقاد کیا گیا ریلی کا اہتمام یونیورسٹی کے کلاک ٹاور پر کیا گیا تھا جہاں سے شرکا ایک جلوس کی شکل میں ایڈمنسٹریشن بلاک کی طرف کشمیر بنے گا پاکستان کے نعرے لگاتے ہوئے رواں دواں رہے ۔ انہوں نے کہا کہ وہ دن دور نہیں جب کشمیری اپنی امنگوں کے مطابق اپنے مستقبل کا فیصلہ کریں گے ۔ اس موقع پر تمام ڈینز، ڈائریکٹرز، فیکلٹی ممبران، رجسٹرار، ٹریژرر اور طلبہ کی بڑی تعداد نے شرکت کی۔ سینئر ٹیوٹر ڈاکٹر شوکت نے کہا دیگر عالمی اداروں کے معاہدوں اور مسئلہ کشمیر کے حوالے سے اقوام متحدہ کی قرار دادوں پر عمل کروایا جائے ۔
