گجرات:ایم ڈی کیٹ ٹیسٹ کیلئے فول پروف انتظامات
گجرات(سٹی رپورٹر ، نامہ نگار)ڈپٹی کمشنر صفدر حسین ورک نے یونیورسٹی آف گجرات کا دورہ کیا اور 22 ستمبر کو ہونے والے ایم ڈی کیٹ ٹیسٹ کے حوالے سے تیاریوں اور انتظامات کا جائزہ لیا۔
اس سلسلے میں اجلاس کی صدارت کی جس میں ایڈیشنل ڈپٹی کمشنر جنرل افضل حیات تارڑ، ایس پی ریاض ناز، سی ای او ہیلتھ ڈاکٹر ذاکر علی رانا، ڈپٹی ڈائریکٹر کالجز ڈاکٹر طاہر عزیز، دیگر ضلعی افسر موجود تھے ۔اجلاس کے دوران ڈپٹی کمشنر صفدر حسین ورک نے کہا کہ ایم ڈی کیٹ ٹیسٹ کے انعقاد کیلئے طلبا و طالبات کے لیے بہترین اور فول پروف انتظامات کیے جائیں گے ۔ انہوں نے مزید کہا کہ تمام معاملات کو حتمی شکل دے دی گئی ہے اور پارکنگ کے وسیع انتظامات کے ساتھ ساتھ پولیس، محکمہ صحت، ریسکیو 1122 اور دیگر متعلقہ ادارے الرٹ رہیں گے ۔ڈپٹی کمشنر نے کہا کہ ایم ڈی کیٹ ٹیسٹ اہم امتحان ہے جو طلبا و طالبات کے مستقبل کا تعین کرتا ہے ، لہٰذا پیپرز اور دیگر مواد کو مکمل سکیورٹی کے ساتھ لاہور سے وصول کیا جائے گا اور سخت حفاظتی حصار میں رکھا جائے گا۔ طلبا و طالبات کی رہنمائی کے لیے سائن بورڈز نصب کیے جائیں گے اور ان کے والدین کے بیٹھنے کے لیے بھی بہترین انتظامات کیے جائیں گے ۔ پینے کا صاف پانی، فرسٹ ایڈ، اور محکمہ صحت کی جانب سے فیلڈ ہسپتال سینٹر بھی قائم کیا جائے گا۔ ٹیسٹ سینٹرز کے اطراف دفعہ 144 نافذ کی جائے گی ۔
