ترقیاتی منصوبوں میں گھپلے:افسروں اور ٹھیکیداروں کیلئے شکنجہ تیار
گوجرانوالہ (سٹی رپورٹر)گوجرانوالہ ڈویژن میں سرکاری اور بلدیاتی اداروں کے ترقیاتی منصوبوں اور مینٹی ننس میں گھپلے کرنے والے افسر وں اور ٹھیکیداروں کیلئے شکنجہ تیار کرلیا گیا۔
ابتدائی مرحلہ میں لسٹیں تیار کرنا شروع کردی گئی ہیں، بد عنوانی اور کرپشن میں ملوث افسر وں کے خلاف کارروائی کی جائے گی اور ٹھیکیداروں کو بلیک لسٹ قرار دیا جائے گا ۔ذرائع کے مطابق مختلف سرکاری اداروں میں سیاستدانوں کی آشیر باد سے ترقیاتی کاموں کیلئے کام کرنے والے ٹھیکیداروں کے خلاف خفیہ طور پر انکوائری شروع کردی گئی ہے جس کے تحت گزشتہ 5 سال میں مذکورہ ٹھیکیداروں نے کن سرکاری ا داروں میں کتنے ترقیاتی منصوبوں کو مکمل کیا اور ٹھیکیدار اور اس کی کمپنی کتنے عرصے سے ایک ہی رکن اسمبلی یاسیاسی خاندان کا کام کر رہی ہے ، کام ملنے کے بعد کمیشن کتنے افسر وں اور سیاستدانوں میں تقسیم ہوتی رہی ہے خفیہ طور پر ایسے کنٹریکٹرز کے نام بھی اس لسٹ میں شامل کئے جائیں گے جو مختلف کمپنیوں پر کام کر رہے ہیں اگر ایک کمپنی ڈیفالٹر ہو جائے تو دوسرے نام سے کام شروع کر دیتے ہیں ،ٹیکسز کی عدم ادائیگی پر بھی کارروائی کی جائے گی ۔
