آسیان ممالک کے وفد کا دورہ سیالکوٹ چیمبر آف کامرس
تجارتی تعلقات سے معاشی تعاون کے نئے دروازے کھلیں گے :صدر احتشام گیلانی
سیالکوٹ (نمائندہ دنیا )آسیان ممالک کے وفد نے سیالکوٹ چیمبر آف کامرس کا دورہ کیا اور تجارت کے فروغ اور بی ٹو بی روابط کے استحکام کے لیے مثبت کردار ادا کرنے کے عزم کا اعادہ کیا۔ وفد میں برونائی کے پاکستان میں تعینات ہائی کمشنر کرنل (ر) پینگیران حاجی کمال باشاہ ، پاکستان میں تعینات سوشلسٹ ری پبلک آف ویتنام کے سفیر فم انہ توآن، پاکستان میں تعینات ملائیشیا کے ہائی کمشنر ایمب دتو محمد اظہر مذلان، پاکستان میں تعینات تھائی لینڈ کے سفیر رونگودھی ورابٹر و دیگر شامل تھے ۔ صدر سیالکوٹ چیمبر احتشام مظہر گیلانی نے کہا کہ سیالکوٹ کے صنعتکار عالمی معیار کے پیداواری عمل سے منسلک ہیں۔ انہوں نے مزید کہا کہ آسیان ممالک کے ساتھ تجارتی تعلقات کے فروغ سے خطے میں معاشی تعاون کے نئے دروازے کھلیں گے ۔ وفد کے اراکین نے سیالکوٹ کی صنعتوں، خصوصاً کھیلوں کا سامان، آلات جراحی، موسیقی کے آلات اور چمڑے کی مصنوعات میں دلچسپی کا اظہار کیا اور دو طرفہ تجارت بڑھانے پر اتفاق کیا۔
