تمام غیر قانونی تعمیرات اور تجاوزات فوری مسمار کی جائیں : چیئرمین سی ڈی اے
اسلام آباد (خصوصی رپورٹر) چیئرمین سی ڈی اے و چیف کمشنر اسلام آباد اور ڈی جی سول ڈیفنس محمد علی رندھاوا نے ہدایت کی کہ سی ڈی اے ہر سیکٹر سے ہر قسم کی غیر قانونی تعمیرات اور تجاوزات فوری مسمار کرے تاکہ ترقیاتی کام بروقت مکمل کیا جاسکے۔
سیکٹر سی چودہ، سی پندرہ، سی سولہ، آئی بارہ، ای بارہ اور پارک انکلیو میں ترقیاتی کاموں میں حائل تمام رکاوٹوں کو ترجیحی بنیادوں پر دورکیا جائے۔ ان خیالات کا اظہار انہوں نے سی ڈی اے ہیڈ کوارٹرز میں اجلاس کی صدارت کرتے ہوئے کیا۔ چیئرمین سی ڈی اے نے مختلف سیکٹرز بشمول سی چودہ، سی پندرہ، سی سولہ، ای بارہ اور پارک انکلیو میں ترقیاتی کاموں کا جائزہ لیا۔ انہوں نے کہا اسلام آباد کی تعمیر وترقی و خوشحالی اور سیکٹر ڈویلپمنٹ سی ڈی اے کی اولین ترجیح ہے اور اس کیلئے تمام دستیاب وسائل بروئے کار لائے جارہے ہیں۔ اسلام آباد کو جدید ڈیجیٹلائز اور سیاحتی شہر بنانے کے علاوہ عوام کی رہائشی سہولیات کو پورا کرنے کیلئے سی ڈی اے سیکٹر ڈویلپمنٹ انفراسٹرکچر کی بہتری، بیوٹیفکیشن اور تفریحی سہولیات کی فراہمی کیلئے بھر پور کوششیں کر رہاہے تاکہ عوام کے مسائل کو ان کی دہلیز پر حل کرنے میں مدد مل سکے۔ اجلاس میں ممبر ایڈمن، ممبر فنانس، ممبر پلاننگ، ممبر انوائرمنٹ، ممبر اسٹیٹ، ڈی جی ورکس، ڈی جی انوائرمنٹ، ڈی جی ای اینڈ ایم سمیت دیگر افسر نے شرکت کی۔
