بروقت تشخیص سے کینسر کا علاج ممکن ہے ، ماہرین صحت
کراچی (اسٹاف رپورٹر) کینسر سے متعلق آگاہی کے عالمی دن پر الخدمت کراچی کے تحت پیما کے اشتراک سے الخدمت اسپتال ناظم آباد میں ہفتہ کی صبح سیمینار منعقد کیا گیا۔۔۔
جبکہ واک کا بھی اہتمام کیا گیا ،جس میں الخدمت کے ذمہ داران، ڈاکٹر ز، پیرا میڈیکل اسٹاف ، مریضوں اور ان کے لو احقین نے شرکت کی۔ سیمینار سے خطا ب میں ماہرین صحت نے کہا کہ بروقت تشخیص سے کینسر کا علاج ممکن ہے ۔ انہوں نے نوجوانوں میں پان، گٹکا اور تمباکو کے استعمال پر تشویش کا اظہار کیا اور نوجوانوں کو ایسی اشیاکے استعمال سے دور رہنے کا بھی مشورہ دیا۔ ماہرین نے کینسر کے پھیلاؤ، اس کی وجوہات اور احتیاطی تدابیر بیان کیں اور لوگوں کو کسی بھی علامت کی صورت میں ماہر ڈاکٹرز سے رجوع کرنے کا مشورہ دیا ۔ ڈاکٹر فراز عالم نے کہاکہ کینسر جسم میں غیر معمولی بے قابو خلیوں کی نشوونما کرتا ہے جبکہ ان کے پھیلاؤکے سنگین نتائج ہوتے ہیں۔ الخدمت فارمیسی سروسز کی ڈاکٹر شاہدہ نے کینسر کے مریضوں کے علاج میں فارماسسٹس کے کردار پر تفصیلی روشنی ڈالی۔ تقریب سے ڈاکٹر سحر رشید و دیگر نے بھی خطاب کیا۔ دریں اثنا کینسر کے بارے میں شہریوں کو آگاہی فراہم، مہلک بیماری کا جلد پتا لگانے اور علاج کے حوالے سے آگاہی واک کابھی اہتمام کیا گیا ۔
