جامعہ کراچی: ایم فل، پی ایچ ڈی کے داخلوں کی منظوری
کراچی (اسٹاف رپورٹر) جامعہ کراچی کے بورڈ برائے اعلیٰ تعلیم و تحقیق نے ایم فل/ پی ایچ ڈی سال 2023 کے داخلوں کی منظوری دے دی ہے۔ داخلے ممکنہ طور پر اتوار 4 جون سے شروع ہوں گے۔
اجلاس منگل کی سہ پہر وائس چانسلر ڈاکٹر خالد محمود عراقی کی صدارت میں ہوا، جس میں ایم فل اور پی ایچ ڈی سال 2023 کے داخلوں کی منظوری دی گئی۔ امکان ہے 4 جون سے داخلے شروع ہوجائیں گے اور خواہش مند طلبا سے درخواستیں طلب کی جائیں گی۔ یہ داخلے پہلے سے رائج ایچ ای سی کی داخلہ پالیسی پر دیے جائیں گے کیونکہ ایچ ای سی کی جانب سے کمیشن کے تحت منظور کردہ داخلہ پالیسی نوٹیفائیڈ نہیں کی گئی ہے۔ ایم فل/ پی ایچ ڈی داخلوں کے حوالے سے ممکنہ طور پر داخلہ ٹیسٹ عید الاضحی کے بعد جولائی میں ہوگا۔ ٹیسٹ پاس کرنے کے لیے امیدواروں کو 50 فیصد مارکس حاصل کرنے ضروری ہوں گے۔ داخلوں کے مرحلے کے بعد کلاسیں جولائی کے آخری عشرے میں شروع کردی جائیں گی۔ فیکلٹی آف لا سمیت ہر اس شعبے میں ایم فل/ پی ایچ ڈی کے داخلے نہیں دیے جائیں گے جہاں مطلوبہ معیار کے مطابق تین پی ایچ ڈی فیکلٹی ممبر نہیں ہیں۔ علاوہ ازیں اجلاس میں پی ایچ ڈی کے ایک مرحوم امیدوار کو کیمسٹری میں بعد از مرگ پی ایچ ڈی ایوارڈ کرنے کی بھی سفارش کی گئی اور اس معاملے کو منظوری کے لیے سینڈیکیٹ کو بھجوا دیا گیا ۔
