جلوسوں کے راستوں پر صفائی ،سکیورٹی انتظامات کی ہدایت
کراچی (آن لائن)گورنر سندھ کامران خان ٹیسوری کی زیر صدارت گورنر ہاؤس میں علمائے کرام کا اجلاس منعقد ہوا، اجلاس میں تمام مکاتب فکر کے علمائے کرام ،ایڈیشنل آئی جی کراچی،کمشنر کراچی اور دیگر متعلقہ افسران نے شرکت کی۔
اجلاس میں 12 ربیع الاول کے جلوسوں کے حوالے سے انتظامات پر بات چیت کی گئی۔ گورنر سندھ نے کہا کہ رمضان المبارک میں تمام مکاتب فکر کے علمائے کرام کو گورنر ہاؤس مدعو کیا۔نبی کریمؐ کی ولادت باسعادت کا دن تمام مسلمانوں کے لئے سب سے اہم ترین ہے ، اس دن ہم سب محسن انسانیت ﷺ کی آمد کا جشن مناتے ہیں، نبی کریمؐ کی آمد سے عرب سے جہالت کے بادلوں کا خاتمہ ہوا، آپ ؐنے خواتین کو ان کے حقوق دیے ، آپ نے اپنے عمل سے ثابت کیا کہ اسلام مکمل ضابطہ حیات ہے ۔ گورنر سندھ نے کہا کہ تمام مکاتب فکر کے علمائے کرام سے گزارش ہے کہ وہ اختلافات بھلا کر ملک و قوم کی ترقی و خوشحالی کے لئے کام کریں، ملک اس وقت ہم سب کی جانب دیکھ رہا ہے ، علمائے کرام بھی اسے معاشی مشکلات سے نکالنے میں کردار ادا کریں۔ کامران ٹیسوری نے کہا کہ تمام جلوسوں کے راستوں پر صفائی ستھرائی، سکیورٹی کے انتظامات یقینی بنائے جائیں اور سڑکوں کی استرکاری اور سیوریج کے پانی کی نکاسی کے لئے خصوصی انتظامات کئے جائیں۔ گورنر سندھ نے کہا کہ 12 ربیع الاول پر گورنر ہاؤس میں عظیم الشان محفل منعقد ہوگی اور چراغاں بھی کیا جائے گا۔
