سی پی ایل سی اور ضلعی انتظامیہ میں تعاون بڑھانے کیلئے کمیٹیاں قائم
کراچی (اسٹاف رپورٹر)کمشنر کراچی سلیم راجپوت نے سی پی ایل سی سے رابطہ و تعاون مضبوط بنانے کیلئے ڈویژنل، ضلعی اور سب ڈویژن سطح پر سی پی ایل سی انتظامیہ رابطہ کمیٹیاں قائم کر دی ہیں ۔۔
تاکہ سی پی ایل سی کو اپنی خدمات موثر بنانے اور شہریوں کو ان کی خدمات سے مستفید ہونے میں رہنمائی اور مدد ملے ،اس کے ساتھ شہر میں جرائم کے خاتمہ میں مدد بھی ملے گی ۔ کمشنر نے اس سلسلے میں کمیٹیوں کو ان کے دائرہ کار اور ذمہ داریوں کی وضاحت کیلئے علیحدہ علیحدہ نو ٹیفکیشن جاری کئے ہیں جس میں کہا گیا ہے کہ زینب الرٹ انیشیٹو کے ذریعے شعور اجاگر کرنے کے مہم کو موثر بنایا جائے گا ،مہم کو موثر بنانے کیلئے تمام تشہیری اور ترغیبی ذرائع اختیار کئے جائیں گے ۔پوسٹر ز کی اشاعت، شہریوں کے ساتھ مل کر واک اور مراتھن کا انعقاد کیا جائے گا۔ سائبر سیفٹی چائلد سیفٹی سمیت حفاظی اصولوں سے آگاہی کیلئے متعلقہ ماہرین کے ساتھ مل کر تعلیمی اداروں میں پروگرام منعقد کئے جائیں گے ۔ تعلیمی اداروں میں ڈرگ کے استعمال کی روک تھام اور اس کے نقصانات سے آگاہی اور اس کی فروخت کی روک تھام کے اقدامات کئے جائینگے ۔ کمیٹیوں کو تجاوزات کی روک تھام اور ان کے انہدام کیلئے بھی نشاندہی کرنے کی ذمہ داری عائدکی گئی ہے ۔ سی پی ایل سی نیبرہوڈ پروجیکٹس اور صفائی کے نظام،سڑکوں کی مرمت اور سڑکوں پر اسٹریٹ لائٹس کی تنصیب کو یقینی بنانے میں ضلعی انتظامیہ کوکوششیں کرنے کی ہدایت کی گئی ہے ۔نوٹیفکیشن کے مطابق 1102 ہیلپ لائن کے ذریعے مدد کے مطلوب جرائم کے شکار افراد کو کمشنر آفس ان کی داد رسی، مصالحت اور ثالثی میں رہنمائی کرے گا۔سی پی ایل سی ضلعی انتظامیہ سے موصول ہونے والی شکایات کے ازالے کے سلسلے میں ایک خصوصی شکایتی مرکز اپنے دفترمیں قائم کرے گا ۔ضلعی انتظامیہ کے افسران کے ساتھ شکایت کے ازالے کی کارکردگی کا جائزہ اجلاس منعقد کرے گا۔
