کلفٹن کا تاریخی مچھلی گھر منہدم کرنے کا فیصلہ
کراچی(رپورٹ :محمد علی حفیظ )کراچی کے تاریخی مچھلی گھر کو منہدم کرنے کا فیصلہ کرلیا گیا۔ کلفٹن باغ ابن قاسم میں موجود بلدیہ عظمیٰ کراچی کے سب سے بڑے مچھلی گھر کی عمارت خستہ حالی کا شکار ہے ۔۔
جبکہ بنیادی پلرز کمزور ہوچکے ہیں۔ کے ایم سی انتظامیہ جلد بین الاقوامی طرز پر نیا مچھلی گھر تعمیر کروانے کیلئے کام کا آغاز کردے گی۔ اس حوالے سے اخراجات کا تخمینہ لگایا جارہا ہے ۔ تفصیلات کے مطابق کراچی کے علاقے کلفٹن میں موجود تاریخی مچھلی گھر کو بین الاقوامی طرز کا مچھلی گھر بنانے کیلئے بلدیہ عظمیٰ کراچی کی انتظامیہ اور میئر کراچی مرتضی وہاب صدیقی نے عملی اقدامات تیز کردیے ہیں ۔کے ایم سی کا تاریخی مچھلی گھر طویل عرصے تک کراچی کے مڈل کلاس شہریوں اور ان کے بچوں کو بھرپور تفریح فراہم کرتا رہا ہے ، تاہم دس برس سے کے ایم سی انتظامیہ اور متعلقہ حکام کی عدم دلچسپی کے سبب مچھلی گھر مکمل طور پر تباہی سے دوچار ہوکر بند پڑا تھا جس کے سبب باغ ابن قاسم میں آنے والے عوام بند مچھلی کو دیکھ کر افسوس کا اظہار کررہے تھے ، اس تمام صورتحال کے بعد میئر کراچی مرتضی وہاب صدیقی اور میونسپل کمشنر افضل زیدی نے بند مچھلی گھر کو دوبارہ آباد کرنے کی غرض سے متعلقہ حکام کے ساتھ مل کر کام کا آغاز کیا ۔اس سلسلے میں کے ایم سی افسران نے ٹیکنیکل ٹیم کے ساتھ مچھلی گھر کا تفصیلی معائنہ کیا تو اس بات کا انکشاف ہوا کہ مچھلی گھر کی عمارت کے بنیادی پلرز اور انفرااسٹرکچر مکمل طور پر کمزور ہوچکا ہے جس کے بعد فیصلہ کیا گیا ہے کہ مچھلی گھر کی عمارت کو منہدم کرکے دوبارہ یہاں نئی عمارت تعمیر کی جائے گی جس میں بین الاقوامی طرز کا مچھلی گھر بنایا جائے گا ۔اس حوالے سے اخراجات کا تخمینہ لگایا جارہا ہے ۔ کے ایم سی کی موجودہ بلدیاتی قیادت کراچی والوں کو سستی تفریح فراہم کرنے کی غرض سے مچھلی گھر کو جلد تعمیر کروانا چاہتی ہے ۔کے ایم سی حکام کے مطابق مچھلی گھر میں 25 سے زائد فش ایکوریم تھے جس میں ہر طرح کی مچھلیاں موجود ہوتی تھیں جبکہ کچوے کیلئے بھی ایک احاطہ مختص تھا ۔مچھلی گھر صبح 9 سے رات8بجے تک عوام کیلئے کھلا رہتا تھا، ایک زمانے میں مچھلی گھر سے ٹکٹ کی مد میں خطیر رقم بھی کے ایم سی کے حصے میں آتی تھی لیکن پھر دیکھتے ہی دیکھتے مچھلی گھر بھوت بنگلے میں تبدیل ہوگیا۔ دوسری جانب مچھلی گھر میں تعینات عملہ بھی میئر کراچی مرتضی وہاب صدیقی کی جانب سے مچھلی گھر کی از سر تعمیر کے پلان پر خوشی کا اظہار کررہا ہے ۔ ان کا کہنا ہے کہ کراچی والوں کی اس مچھلی گھر سے بڑی یادیں وابستہ ہیں، مچھلی گھر کی دوبارہ تعمیر شہریوں کیلئے ایک بڑا تحفہ ثابت ہوگا۔
