دہشتگردی کے تین بڑے واقعات لمحہ فکریہ ،حسین محنتی
کراچی(اسٹاف رپورٹر) امیرجماعت اسلامی سندھ محمد حسین محنتی نے مستونگ میں خود کش دھماکے کی شدید الفاظ میں مذمت کرتے ہوئے واقعے میں قیمتی جانوں کے ضیاع پر گہرے دکھ اور افسوس کا اظہار کیا ہے۔۔
ایک دن میں دہشتگردی کے تین بڑے واقعات کا ہونا اور درجنوں انسانی جانوں کا ضیاع کھربوں روپے سیکورٹی پر خرچ کرنے والے حکمرانوں اور قانون نافذ کرنے والے اداروں کیلئے لمحہ فکریہ ہے ۔ ایک بیان میں انہوں نے مزید کہا کہ حکمرانوں اور قانون نافذ کرنے والے اداروں کی جانب سے ہمیشہ یہی راگ الاپا جاتا رہا کہ دہشتگردوی کو جڑ سے اکھاڑدیں گے لیکن کئی آپریشن، لاکھوں لوگوں کو بے گھر کرنے کے بعد آج بھی فاٹا اور بلوچستان دہشتگردی کی آگ میں جل رہے ہیں جبکہ نگراں وزیراعظم سیرسپاٹوں میں مصروف اور اپنے آقاؤں کے سیاسی ایجنڈا کو مکمل کرنے کیلئے مصروف ہیں، ضرورت اس امر کی ہے کہ اب دہشتگردی کے ناسور کو جڑ سے ختم کرنے کیلئے تمام سیاسی جماعتوں،اسٹیک ہولڈرز کو ساتھ بٹھا کر لائحہ عمل ترتیب دیاجائے ۔دہشتگرد وں نے نہتے اور بے گناہ انسانوں کا خون بہاکر ثابت کردیا ہے کہ وہ انسانیت کے نام پر بدنما داغ ہیں،دہشت گرد بزدلانہ حملوں سے قوم کا حوصلہ پست نہیں کر سکتے ، پوری قوم دہشت گردی کے خلاف متحد ہے ، ملک کی سلامتی اور امن کیخلاف سازشوں کو عوامی حمایت اور ریاستی رٹ مضبوط بنا کر ناکام بنایا جائے ۔انہوں نے شہداکے لیے مغفرت کی دعا بھی کی۔
