سندھ حکومت اسٹریٹ کرائم روکنے میں ناکام ، حافظ نعیم
کراچی (اسٹاف رپورٹر )امیرجماعت اسلامی کراچی حافظ نعیم الرحمٰن نے شہر میں اسٹریٹ کرائمز میں اضافہ اور کرائمز کے واقعات میں پولیس افسران کی ملی بھگت پر گہری تشویش کا اظہار کرتے ہوئے کہا کہ۔۔۔
کراچی کے ساڑھے 3 کروڑ عوام کے محافظ ہی عوام کی جان و مال کے دشمن بن گئے ہیں۔سندھ حکومت اسٹریٹ کرائم کو روکنے میں بری طرح ناکام ہوگئی،اسٹریٹ کرائمز کی صورتحال انتہائی تشویشناک ہے ، شہر میں ڈکیتی کا چوتھا واقعہ ہوا جس میں پولیس کے اہلکار ملوث ہیں، پولیس کے محکمے میں کالی بھڑیں شامل ہوگئی ہیں جو سسٹم پر بد نما داغ بنے ہوئے ہیں۔اپنے بیان میں انہوں نے کہا کہ سپاہی سے لے کر ایس ایچ او، ڈی ایس پی سمیت سب کے سب کرپشن کے نظام میں ملوث ہیں،اس نظام کی سپرستی کرنے والے سسٹم میں موجود ہیں،شہریوں کو شدید مالی اور ذہنی اذیت کا سامنا ہے ۔پولیس کی عدم توجہی اور محکمہ پولیس میں کالی بھیڑوں کی موجودگی کے باعث جرائم پیشہ عناصر اور گروہ بڑے پیمانے پر بلاخوف و خطر لوٹ مار کی وارداتیں کر رہے ہیں جسے سے شہری اپنے آپ کو غیر محفوظ اور بے بس تصور کر رہے ہیں۔ حافظ نعیم نے مزید کہا کہ اسٹریٹ کرائمز کی وارداتوں کی روک تھام کیلئے پولیس کے محکمے میں کراچی سے 80فیصد بھرتی کی جائے ،چاہے وہ کوئی بھی زبان بولنے والا ہوں لیکن کراچی کا مستقل رہائشی ہو اور پولیس کے محکمے میں اسکروٹنی کی جائے ۔
