چینی کمپنی کا بسوں کا مینو فیکچرنگ پلانٹ لگانے کا فیصلہ
کراچی(اسٹاف رپورٹر )دنیا کی سب سے بڑی بس ساز کمپنی یوٹونگ نے کراچی میں انٹرا سٹی اور ای وی بسز کا پلانٹ لگانے کا فیصلہ کرلیا۔سندھ کے سینئر وزیر اور صوبائی وزیر برائے اطلاعات، ٹرانسپورٹ، ماس ٹرانزٹ، ایکسائز ، ٹیکسیشن و نارکوٹکس کنٹرول شرجیل انعام میمن کی جانب سے عوام کے لیے بہت بڑی خوش خبری سامنے آئی ہے ۔
اس سلسلے میں دنیا کی سب سے بڑی بس ساز کمپنی یوٹونگ مشرق وسطیٰ کے سی ای او اور دیگر حکام نے کراچی میں سندھ کے سینئر وزیر شرجیل انعام میمن سے ملاقات کی۔سینئر وزیر شرجیل انعام میمن کی جانب سے جولائی 2022ء میں دی گئی دعوت پر یوٹونگ کمپنی نے کراچی میں پلانٹ لگانے کا فیصلہ کیا ہے ۔اس حوالے سے سندھ کے سینئر وزیر اور صوبائی وزیر برائے اطلاعات، ٹرانسپورٹ، ماس ٹرانزٹ، ایکسائز ، ٹیکسیشن و نارکوٹکس کنٹرول شرجیل انعام میمن نے کہا ہے کہ دنیا کی سب سے بڑی بس ساز کمپنی یوٹونگ کی جانب سے کراچی میں پلانٹ لگانے کا کام تین ماہ کے اندر شروع ہو جائے گا جب کہ پلانٹ کا کام اگلے سال 2005تک مکمل ہو جائے گا۔انہوں نے کہا کہ یوٹونگ کی انٹرا سٹی اور الیکٹرک بسز اب کراچی میں بنیں گی۔ انہوں نے کہا کہ پلانٹ میں ای وی بسز اور ہائبرڈ ڈیزل بسز تیار کی جائیں گی، پلانٹ لگنے سے صنعتوں کو فروغ ملے گا، روزگار کے نئے مواقع پیدا ہوں گے ۔ سینئر وزیر شرجیل انعام میمن نے مزیدکہا کہ کراچی میں بسز کی تیاری سے پاکستان کا زرمبادلہ بھی بچے گا، بسوں کی ایکسپورٹ سے پاکستان کو بھی فائدہ ہوگا۔
