8فروری کو عوامی مینڈیٹ پر ڈاکا ڈالا گیا،منعم ظفر خان
کراچی (اسٹاف رپورٹر )امیر جماعت اسلامی کراچی منعم ظفر خان نے کہا ہے کہ 8فروری 2024کو عام انتخابات میں عوامی مینڈیٹ پر ڈاکا ڈالا گیا، فارم 45کے بجائے فارم 47کے ذریعے ہارے ہوئے لوگوں کو مسلط کیاگیا۔۔۔
ایم کیو ایم کراچی میں 5500پولنگ اسٹیشن میں سے کسی ایک پر بھی نہیں جیتی لیکن اسے قومی اسمبلی کی 15نشستیں اور پیپلز پارٹی کو 7نشستیں دے دی گئیں،صوبائی اسمبلی کی 25نشستیں ایم کیو ایم کو،بقیہ پیپلز پارٹی اور دیگر لوگوں میں تقسیم کی گئیں۔پریس کانفرنس سے خطاب میں انہوں نے کہاکہ عوامی رائے کو کچلنے کے عمل میں الیکشن کمیشن نے فراڈ کمیشن ہونے کا ثبوت دیا۔ ہفتہ 8فروری کو ملک گیر‘‘یوم ِ سیاہ ’’کے سلسلے میں الیکشن کمیشن سندھ کے باہر بڑا احتجاجی مظاہرہ کیا جائے گا۔ انہوں نے مزید کہاکہ بدترین دھاندلی کے ثبوت و شواہد الیکشن کمیشن اور ٹریبونلز میں پیش کیے مگر ایک سال ہوگیا کوئی شنوائی نہیں ہو رہی ۔دوسری جانب منعم ظفر نے روسی قونصل جنرل اینڈ ریو شیروف، ایرانی ڈپٹی قونصل جنرل وحید اصغری اور ٹاؤن چیئر مین گلشن اقبال ڈاکٹر فواد احمد کے ہمراہ گلشن اقبال ٹاؤن کے تحت محمود غزنوی پارک بلاک 16میں پھولوں اور پرندوں کی 3روزہ نمائش کا افتتاح کر دیا،نمائش میں موسمِ بہار کی مناسبت سے مختلف پھول اور رنگ برنگے پرندے رکھے گئے ہیں، فلاور و برڈ شو میں مکینوں نے گہری دلچسپی کا اظہار کیا اور جماعت اسلامی کے منتخب بلدیاتی نمائندوں کی کوششوں کو سراہا۔
