پولیس چیف کی جرائم پیشہ عناصر کے خلاف کارروائیاں تیزکرنے کی ہدایت
کراچی(این این آئی)ایڈیشنل آئی جی کراچی جاوید عالم اوڈھو کی زیر صدارت کراچی پولیس آفس میں ایک اہم اجلاس منعقد ہوا جس میں شہر کی سکیورٹی صورتحال اور پولیس کے مختلف اقدامات پر تبادلہ خیال کیا گیا۔
اجلاس میں کراچی پولیس کے سینئر افسران نے شرکت کی اور شہر میں امن و امان کی بحالی کے لیے جاری آپریشنز کی پیش رفت پر تفصیلی غور کیا۔اجلاس میں کراچی میں بڑھتے ہوئے جرائم کی روک تھام، پولیس کی کارکردگی میں بہتری اور شہریوں کی حفاظت کے لیے نئے اقدامات پر بات چیت کی گئی۔ایڈیشنل آئی جی نے پولیس افسران کو ہدایت کی کہ وہ جرائم پیشہ عناصر کے خلاف کارروائیاں تیز کریں اور شہریوں کی جان و مال کے تحفظ کو یقینی بنائیں۔اس موقع پر انہوں نے کراچی پولیس کی موجودہ حکمت عملی کو مزید موثر بنانے کے لیے ضروری اقدامات کرنے کی اہمیت پر زور دیا اور پولیس اہلکاروں کو جدید تربیت دینے کی ضرورت پر بھی گفتگو کی۔اجلاس میں شہر کی مختلف تھانوں کی کارکردگی کا جائزہ بھی لیا گیا۔
