ملک کو ایک بار پھر بینظیر بھٹو جیسی قیادت کی ضرورت، جبار خان
حیدر آباد (نمائندہ دنیا) وزیراعلیٰ سندھ کے معاون خصوصی برائے خوراک عبدالجبار خان نے کہا ہے کہ شہید بینظیربھٹو کی ذہانت اور صلاحیتوں کا اعتراف دنیا بھر میں کیا جاتا ہے۔
انہوں نے جس وژن کے ساتھ پاکستان میں حکومت کی اور ملک کو دہشت گردی و انتہاپسندی سے پاک کرنے کیلئے جو قربانیاں دیں وہ تاریخ کاحصہ ہیں ۔ شہید بی بی کی سالگرہ کے سلسلے میں سائٹ ایریا حیدرآباد میں منعقدہ تقریب سے خطاب کرتے ہوئے انہوں نے مزید کہاکہ ملک کو آج ایک بار پھر بینظیربھٹو جیسی مدبر اور باصلاحیت قیادت کی ضرورت ہے ، جو ملک کو درپیش چیلنجز ، مہنگائی اور بیروزگاری کے خاتمے کے لئے اپنا کردار ادا کرے ۔ انہوں نے کہا کہ ذوالفقارعلی بھٹو کی شہادت کے بعد محترمہ بینظیربھٹو نے جس طرح پاکستان پیپلزپارٹی کی قیادت کی اور ملک کو ترقی کی طرف گامزن کیا اس کا اعتراف پوری دنیا میں کیا جاتا ہے ۔ ان کا کہنا تھا کہ بینظیربھٹو نے دہشت گردی کا خاتمہ کیا اور اپنی جان تک وطن کیلئے قربان کردی ۔ تقریب سے فیصل عبدالجبار خان، سید فیاض شاہ اور دیگر نے بھی خطاب کیا۔
