ایرانی جوہری تنصیبات پر حملہ غیر قانونی، سربراہ سنی تحریک
کراچی (این این آئی)سربراہ پاکستان سنی تحریک محمدشاداب رضا نقشبندی نے کہا ہے کہ امریکا کا ایران کی جوہری تنصیبات پر حملہ عالمی قوانین کی کھلی خلاف ورزی ہے ،اسرائیل اور امریکا اقوام متحدہ کے عالمی چارٹرڈ کی دھجیاں بکھیر رہے ہیں۔
امریکا نے اسرائیل کے ساتھ دے کر اپنی حیثیت کا متنازعہ بنادیا ہے ۔ایک بیان میں انہوں نے مزید کہا کہ فلسطین وغزہ میں مسلم نسل کشی کے خلاف اور سلامتی کونسل کی غزہ جنگ بندی کی قرار دادوں پر ویٹو کرنا امریکہ اسرائیل کے پیچھے کھڑا ہے ،امریکہ کو چاہیے تھا کہ وہ ایران اسرائیل تنازعہ وجارحیت کو ختم کرنے کیلئے کردار ادا کرتا وہ خود جنگ کا فریق بن گیا،اقوام متحدہ عالمی قوانین پر عمل درآمد نہیں کراسکتی تو ایسے ادارے کو بند ہوجانا چاہیے ،اسرائیل کی جنگی جرائم پر مبنی انسانیت سوز مظالم ومسلم نسل کشی پوری دنیا پر عیاں ہوچکی ہے ،اقوام متحدہ صرف طفل تسلی سے کام چلانے کی بجائے عملی کردار ادا کرے عالمی قوانین کی خلاف ورزی کرنیوالوں پر عالمی عدالت میں مقدمہ چلائے ،روزانہ کی بنیاد پر درجنوں افراد غزہ میں شہید ہورہے ہیں،اسرائیل اور امریکا کو جارحیت اور جنگی جرائم سے کون روکے گا اگر یہی حالت رہی تو تیسری عالمی جنگ ہوسکتی ہے ۔انہوں نے کہا کہ ساری دنیا جانتی ہے جنگ سے تباہی بربادی اور اموات ہوتی ہے معاملات خراب ہوتے ہیں،جنگ ہونے کے بعد بھی ڈائیلاگ ہونا ہے تو پھر جنگ کی بجائے بات چیت کی ٹیبل لگائی جائے ،ایران پر امریکہ کا حملہ غیر ذمہ دارانہ عمل ہے اس سے حالات خراب ہونگے ،انہوں نے کہا کہ نیتن یاہو،نریندر مودی الیکشن جیتنے اور آئندہ پانچ سال حکومت پر براجمان رہنے کیلئے اوچھے ہتھکنڈے استعمال کررہے ہیں، اسرائیل ناجائز غاصب (ریاست)ہے اس کو کسی طور بھی تسلیم نہیں کیا جاسکتا۔
