سندھ میں پیسہ بنانے کے سواکوئی کام نہیں ہورہا،منعم ظفر
کراچی (اسٹاف رپورٹر)امیرجماعت اسلامی کراچی منعم ظفر خان نے امیر ضلع گلبرگ وسطی کامران سراج اور ٹاؤن چیئرمین نصرت اللہ کے ۔۔۔
ہمراہ ٹی ایم سی گلبرگ کے تحت حسین آبادیوسی 7، فیڈرل بی ایریا بلاک 3 میں خاتون ِ جنت پارک کا افتتاح کردیا، پارک کے افتتاح پر علاقہ مکینوں نے جماعت اسلامی کے بلدیاتی نمائندوں کی کوششوں کو سراہا اور اظہار تشکر کیا، خاتون جنت پارک میں گھاس، پودے اور اس کی دیواریں ازسر نو بنائی گئی ہیں۔ اس موقع پر خاتون جنت پارک کی جماعت اسلامی کی کوششوں سے تعمیر ِ نو سے قبل اسکرین پر دکھایا گیا جبکہ اب پارک منفرد منظر پیش کررہا ہے ۔ اس موقع پر منعم ظفر خان نے کہا کہ یہ پارک بھی عوام کے لیے جماعت اسلامی کا تحفہ ہے ، قابض میئر اور17 سال سے صوبہ پر براجمان پیپلزپارٹی کی سندھ حکومت کو کراچی کے عوام کے مسائل سے کوئی سروکار نہیں۔ اگر پیپلزپارٹی کو مسائل کے حل سے دلچسپی ہوتی تو کراچی کے ساڑھے تین کروڑ عوام کو بجلی،پانی،صحت، تعلیم اور ٹرانسپورٹ سمیت دیگر سہولیات اور ضروریات میسر ہوتیں۔ پیپلزپارٹی کی صوبائی حکومت نے کراچی کے سارے اداروں اور وسائل پر قبضہ کیا ہواہے اور سوائے پیسہ بنانے کے کوئی کام نہیں ہورہا۔ امسال کراچی کے عوام نے 3 ہزار ارب روپے ٹیکس ادا کیا لیکن آدھا کراچی پانی سے محروم ہے ، اسلام آباد میں انڈر پاس 20 دن میں بن جاتا ہے لیکن کراچی میں کوئی بھی پروجیکٹ تو وقت پر مکمل نہیں ہوتا۔
