کورنگی، گلشنِ اقبال اور ملیر میں اسکوٹی تربیت کا آغاز
پنک اسکوٹی کیلئے درخواست دینے والی ورکنگ وومینز کی حوصلہ افزائی کرینگےمحفوظ سفری سہولیات فراہم کیے بغیر خواتین کو بااختیار نہیں بنایا جا سکتا ،شرجیل انعام
کراچی(اسٹاف رپورٹر)سندھ کے سینئر وزیر اور صوبائی وزیر برائے اطلاعات، ٹرانسپورٹ و ماس ٹرانزٹ شرجیل انعام میمن نے کہا ہے کہ کراچی میں کورنگی، گلشنِ اقبال اور ملیر میں تربیت کا آغاز ہوچکا ہے ، اور کراچی کے تمام اضلاع میں پنک اسکوٹی کے لیے درخواست دینے والی ورکنگ وومینز کی خصوصی حوصلہ افزائی کی جائے گی۔ گزشتہ روزاپنے بیان میں انہوں نے بتایا کہ حیدرآباد میں اسکوٹی تربیت 18 دسمبر سے شروع ہوئی ہے ، جبکہ سندھ کے دیگر شہروں سکھر، لاڑکانہ، شہید بے نظیر آباد اور میرپورخاص میں بھی تربیت جلد شروع کی جائے گی، تاکہ زیادہ سے زیادہ خواتین اس پروگرام سے مستفید ہو سکیں۔ان کا کہنا تھا کہ اسکوٹی چلانے کی تربیت، محفوظ رائیڈنگ کے لیے دی جارہی ہے ، اور اس اسکیم کا مقصد خواتین کی محفوظ اور آسان نقل و حرکت کو فروغ دینا ہے ۔ خواتین کو بااختیار بنانا حکومتِ سندھ کی اولین ترجیحات میں شامل ہے ۔ انہوں نے مزید کہا کہ خواتین کی خودمختاری صرف معاشی نہیں بلکہ سماجی آزادی سے بھی جڑی ہوئی ہے ، اور محفوظ سفری سہولیات فراہم کیے بغیر خواتین کو عملی طور پر بااختیار نہیں بنایا جا سکتا۔ سندھ کے سینئر وزیر اور صوبائی وزیر برائے اطلاعات، ٹرانسپورٹ و ماس ٹرانزٹ شرجیل انعام میمن نے واضح کیا کہ اسکوٹی تربیتی پروگرام خواتین کو خود اعتمادی، خود انحصاری اور عملی آزادی کی جانب ایک اہم قدم فراہم کرتا ہے ، اور طالبات، نوجوان خواتین اور ملازمت پیشہ خواتین اس اسکیم سے بھرپور فائدہ اٹھا سکیں گی۔
