بک فیئرکا دوسرا روز، رعایتی قیمت پر کتابوں کی فروخت جاری
اسکولز، کالج، جامعات، مدارس کے طلبہ، سماجی، ادبی شخصیات کا دورہ میلہ کراچی کی پہچان بن چکا ،پورے سال اسکا انتظار کرتے ہیں ،شہری
کراچی (این این آئی)کراچی ایکسپو سینٹر میں جاری پانچ روزہ کراچی ورلڈ بک فیئرکے دوسرے دن بھی شائقین کتب کا تانتا بندھا رہا۔ صبح سے ہی اسکولز، کالج، جامعات، مدارس کے طلبہ، مذہبی، سماجی، ادبی، صحافتی شخصیات نے میلے کا دورہ کیا اور اپنی پسند کی کتابیں خریدیں۔ ورلڈ بک فیئر میں پبلشرز اور بک سیلرز کی جانب سے 30سے 50فیصد تک رعایتی قیمت پر کتب فروخت کی جارہی ہیں۔ میلے میں نجی بینک نے اے ٹی ایم وین کی سہولت بھی فراہم کی ہے ۔اے ٹی ایم کی وین نمائش کے آخری دن تک موجود رہے گی جبکہ کسی بھی ہنگامی صورت حال کے لیے ایمولینس کا بھی انتظام ہے ۔ کتب میلے میں آنیوالے شائقین کتب کاکہنا تھا کہ کتب میلہ کراچی کی پہچان بن چکا ہے ، اس جدید دور میں بھی کتب کی اہمیت ختم نہیں ہوئی ہے ۔ ان کا کہنا تھا کہ علم کی پیاس بجھانے کے لیے یہ میلہ لگا ہے ، یہاں شہریوں کی بڑی تعدادمیں شرکت اس بات کی مظہر ہے کہ شہر قائد کے لوگ علم و کتب سے محبت کرنے والے لوگ ہیں۔ بچے ، مرد، خواتین، بزرگ الغرض تمام عمر کے لوگ کتب سے دلچسپی رکھتے ہیں۔ کراچی عالمی کتب میلہ میں شہریوں کا کہنا تھا کہ اس بک فیئر میں کتابیں رعایتی قیمت پر مل جاتی ہیں ہم اپنے بچوں کو پورے سال تسلی دیتے ہیں کہ کتب میلہ لگے گا تو کتاب خرید کر لائیں گے ۔
