ڈاکٹر عمران فاروق کی اہلیہ شمائلہ عمران کا سوئم
خالد مقبول ،انیس قائم خانی، مرکزی کمیٹی کے اراکین ودیگر کی شرکتمرحومہ کی قربانیاں تحریک کی تاریخ میں سنہری حروف سے لکھی جائیں گی،رہنما
کراچی (این این آئی) متحدہ قومی موومنٹ پاکستان کے سابق کنوینر شہیدِ انقلاب ڈاکٹر عمران فاروق کی بیوہ و سینئر کارکن و سابق رکن صوبائی اسمبلی شمائلہ عمران فاروق مرحومہ کے ایصالِ ثواب کے لیے سوئم کا اجتماع اتوار کے روز ان کی رہائش گاہ پر منعقد کیا گیا، جس میں ایم کیو ایم پاکستان کے چیئرمین ڈاکٹر خالد مقبول صدیقی، سینئر مرکزی رہنما انیس قائم خانی سمیت مرکزی کمیٹی کے دیگر اراکین، اراکینِ پارلیمنٹ، سینٹرل آرگنائزنگ اینڈ کوآرڈینیشن کمیٹی کے ذمہ داران، انچارج سی او سی فرقان اطیب و اراکین اور کارکنان کی بڑی تعداد نے شرکت کی۔ سوئم کے موقع پر رقت آمیز مناظر دیکھنے میں آئے ، جہاں پارٹی قیادت نے شہید ڈاکٹر عمران فاروق کے صاحبزادوں عالیشان فاروق اور وجدان فاروق سے ملاقات کی اور ان سے تعزیت کرتے ہوئے دلاسہ دیا۔ اس موقع پر قیادت کا کہنا تھا کہ مرحومہ شمائلہ عمران فاروق تحریک کا اثاثہ تھیں، انہوں نے کڑے وقت میں جس بہادری اور استقامت سے مشکل حالات کا سامنا کیا وہ تمام کارکنان کے لیے مشعلِ راہ ہے ، ان کی قربانیاں تحریک کی تاریخ میں ہمیشہ سنہری حروف سے لکھی جائیں گی۔ سوئم کے اجتماع میں تلاوتِ کلام پاک اور نعت خوانی کے بعد مرحومہ کے درجات کی بلندی اور لواحقین کے لیے صبرِ جمیل کی خصوصی دعا کی گئی، جس میں ایم کیو ایم کے ذمہ داران و کارکنان اور اہل محلہ سمیت معززینِ شہر نے کثیر تعداد میں شرکت کی۔
