واہگہ زون:141 غیر قانونی تجارتی اور صنعتی تعمیرات:افسر، عملہ ملوث
لاہور(عمران اکبر)واہگہ زون کے کنٹرولڈ ایریاز میں 141 غیر قانونی بڑی تجارتی و صنعتی تعمیرات کا انکشاف ہوا ہے،سرکاری رپورٹ کے مطابق غیر قانونی تعمیرات کرانے میں افسر اور بلڈنگ انسپکٹر ز بھی ملوث ہیں۔
تفصیل کے مطابق شہر میں غیر قانونی تعمیرات کا راج برقرار ہے ۔سرکاری رپورٹ میں انکشاف سامنے آیا ہے کہ 141غیر قانونی تعمیرات میں سے 85 زیر تعمیر اور 56 پایا تکمیل کو پہنچنے کے قریب ہیں ،غیر قانونی تعمیرات سے خزانے کو10کروڑ سے زائد کانقصان پہنچایا گیا۔رپورٹ کے مطابق غیر قانونی تعمیرات کرانے میں ایم او پلاننگ واہگہ زون ،بلڈنگ انسپکٹرز ملوث ہیں۔سرویئرز،کلرکس ،ہیلپرالیکٹریشن ،گینگ مین،نائب قاصد ،ورک چارج ملازمین اور پرائیویٹ افراد بھی پیش پیش ہیں۔ جی ٹی روڈ جیسے فروزن ایریاز میں 45 غیر قانونی تعمیرات کر ا دی گئیں ۔رپورٹ میں انکشاف ہوا ہے کہ برکی روڈ پر 4 ،بھینی روڈ 2، کوٹلی گھاسی 7، بلال گنج سکیم 3،مقصود پورہ 1، بیدیاں روڈ پر 8 کمرشل ،انڈسٹریل اور مارکیز ،ہانڈو روڈ پر 2 کمرشل و انڈسٹریل تعمیرات پر کام جاری ہے ۔ گنجے سندھو روڈ، تاج گڑھ روڈ پر ایک ایک، مومن پورہ روڈ 6، گنجے سندھو چوک میں دو کمرشل غیر قانونی تعمیرات کی نشاندہی کی گئی ۔اسی طرح رنگ روڈکی سروس روڈ پر بھی غیر قانونی کمرشل تعمیرات جاری ہیں۔ ڈائریکٹرایڈمن کلیم یوسف کا کہنا ہے غیر قانونی بلڈنگز کو سیل ،ملوث افسروں اوربلڈنگ انسپکٹرز کے خلاف انکوائری کی جائے گی۔
